قازاقستان 36 مەملەكەتكە بالىق ونىمدەرىن ەكسپورتتايدى
بۇل تۋرالى بۇگىن وتكەن ۇكىمەت وتىرىسىندا ق ر ەكولوگيا، گەولوگيا جانە تابيعي رەسۋرستار ءمينيسترى ماعزۇم مىرزاعاليەۆ ايتتى، دەپ حابارلايدى قازاقپارات ءتىلشىسى.
«ءبىزدىڭ ەلىمىز ءوزىنىڭ باي ءارى بىرەگەي تابيعاتىنىڭ ارقاسىندا ايتارلىقتاي قۋاتتى بالىق شارۋاشىلىعى قورىنا يە. بۇل باعىتتا ەكسپورتتىق پوتەنتسيال جوعارى. ەلىمىزدىڭ بالىق ونىمدەرى نارىعىنىڭ جالپى كولەمى 2019-جىلى شامامەن 66 مىڭ توننانى قۇرادى. ونىڭ قۇرىلىمى كەلەسىدەي: بالىق اۋلاۋ - 45 مىڭ توننا، بالىق ءوسىرۋ - 7,4 مىڭعا جۋىق توننا، ەكسپورت - 30 مىڭ توننا، يمپورت - 43,5 مىڭ توننا»، - دەدى ماعزۇم مىرزاعاليەۆ.
مينيستر بالىق ونىمدەرىنىڭ ەكسپورتى تۋرالى ايتا كەلە، قازاقستان نەگىزىنەن بالىقتىڭ جون ەتىن، كەپتىرىلىپ-ىستالعان ونىمدەردى جانە بالىقتىڭ توڭازىتىلعان ەتىن ەكسپورتتايتىنىن ءمالىم ەتتى.
«قازاقستان مۇحيت بالىقتارى مەن تەڭىز ونىمدەرىن يمپورتتايدى. ولار - مايشاباق، سكۋمبريا، اسشايان، ميديا جانە تاعى باسقالارى. يمپورت نورۆەگيا، رەسەي، يسلانديا، قىتاي جانە بالتىق جاعالاۋى ەلدەرىنە تيەسىلى. ءوز كەزەگىندە، قازاقستان جىل سايىن تاياۋ جانە الىس شەتەلدىڭ 36 ەلىنە شامامەن 60 ميلليون ا ق ش دوللارى سوماسىنا 30 مىڭ توننا بالىق ونىمدەرىن ەكسپورتتايدى. نەگىزىنەن ءبىز بالىقتىڭ جون ەتىن، كەپتىرىلىپ-ىستالعان ونىمدەردى جانە بالىقتىڭ توڭازىتىلعان ەتىن ەكسپورتتايمىز. مىسالى، كوكسەركەنىڭ جون ەتى ەۋروپالىق وداق ەلدەرىندە (گەرمانيا، نيدەرلاندى) قازاقستاندىق برەند بولىپ سانالادى. ال كەپتىرىلىپ-ىستالعان ونىمدەر رەسەي، ۋكراينا، ليتۆا، قىتاي جانە باسقا ەلدەرگە ەكسپورتتالادى»، - دەيدى ول.
