حاڭجوۋدان - نۇر-سۇلتانعا. 35 كۇن كارانتيندە بولعان ستۋدەنتپەن سۇحبات

ءيا، دەرتتىڭ دەسى قاتتى. الەمدە كوروناۆيرۋستىڭ قارماعىنا ىلىنبەگەن ەل از. ازدىڭ قاتارىندا ءبىز دە بارمىز. الايدا كۇن ساناپ «شەڭگەلسىز شەڭبەر» تارىلىپ كەلەدى. قاتەرلى كەسەل تۋرالى سۋىت حابار تارالىسىمەن قازاقستان ساقتانۋدىڭ قامىنا كوشتى.

اۋەدەگى، جولدارداعى، شەكاراداعى ادامدار تاسقىنىنا توسقاۋىل قويىلدى. ءتۇرلى سەبەپتەرمەن جات جەردىڭ جەرىن باسىپ جۇرگەن جەرلەستەرىمىز جەدەل ەلگە جەتكىزىلدى. ونىڭ ىشىندە، جەمىرگە جاقىن جۇرگەندەر جۇقتىرۋى مۇمكىن دەگەن قاۋىپپەن قوعامنان وقشاۋلاندى.

قۇزىرلى ورگان وكىلدەرىنىڭ مالىمەتىنە سۇيەنسەك، قازىر 703 ادام كارانتينگە جابىلعان. 21 جاستاعى ءلايلا سانوۆا 14 كۇنىن اۋرۋحانادا وتكىزىپ كەلدى. بويجەتكەن حاڭجوۋ قالاسىنداعى Zhejiang Gongshang ۋنيۆەرسيتەتىندە لوگيستيكا ماماندىعىنىڭ 3 كۋرسىندا وقيدى.

- COVID حاڭجوۋ قالاسىنا قاڭتاردىڭ اياق تۇسىندا كەلدى. ءىزىن الا مەن ءبىلىم الىپ جاتقان اۋداننان ءبىلىندى. سوعان بايلانىستى اقپان ايىنىڭ 2-سىندە ءبىزدى جاتاقحاناعا كارانتينگە جاپتى. باسىندا 7 كۇن بولاسىڭدار دەدى، ودان كەيىن 20 كۇنگە ۇزارتاتىندارىن ايتتى. مۇعالىمدەرىمىز تاماق، ماسكانى وزدەرى جەتكىزىپ تۇردى. سول جاقتاعى دوستارىممەن حابار الىسىپ وتىرامىن، ولار ءالى كۇنگە جاتاقحانادا، كارانتيندە جاتىر... دەنى افريكالىقتار.

- ەلگە قايتۋ تۋرالى شەشىمدى وزدەرىڭ قابىلدادىڭدار ما، ەلشىلىكتەن جاردەم بولدى ما؟

- ەلگە ءوز كۇشىمىزبەن قايتتىق. ونىڭ الدىندا ەلشىلىكتەن ۇيلەرىنە ورالعىسى كەلەتىندەر اتى- ءجونى، پاسپورت ءنومىرىن جازىپ جىبەرسىن دەگەن حابارلاما كەلدى. پەكين ارقىلى الماتى، نۇر- سۇلتان قالالارىنا رەيستەر ۇسىنىلدى. ءبىراق قۇربىم ەكەۋمىز وعان ۇلگەرمەدىك. سودان 20- اقپانداعى تاڭەرتەڭگىلىك ۇشاققا بيلەت الدىق. الدىمەن حاڭجوۋدان گۋاڭجوۋعا جەتىپ، وندا 1 كۇن ايالداپ، كەيىن ماسكەۋ ارقىلى قازاقستانعا كەلدىك.

- اۋەجايلاردا تەكسەرىستەن وتتىڭدەر مە؟ ءار ەلدىڭ تالابى ءارتۇرلى شىعار..

- ءيا، جاتاقحانادان شىقپاس بۇرىن تەكسەرىستەن وتكىزەدى، سودان كەيىن عانا رۇقسات قاعازى بەرىلەدى. اۋەجايدىڭ كىرەبەرىسىندە دە سول تالاپ. ماسكامەن ءجۇرۋ مىندەتتەلدى. ۇشاق ىشىندە ماماندار جولاۋشىلاردىڭ ءحالىن تاعى ءبىر رەت تەكسەردى. قولدارىندا ارنايى اپپاراتتارى بار. ماسكەۋدىڭ شەرەمەتيەۆو اۋەجايىندا جاعداي ءسال باسقاشا ەكەن. دارىگەرلەر سول جەردەن اۋىز، مۇرىن قۋىسىنان جۇعىندى الىپ، دەنە قىزۋىن ولشەدى، اتى- ءجونىمىزدى جازىپ الدى. سالىستىرار بولساق، ول كەزدە قىتايدا اسا ءبىر قاربالاس بايقالماعان- دى، ءبارى قالىپتى جاعدايدا جاسالدى.

- بىزدە شە؟

- 22- اقپان كەشكىسىن ەلدە بولدىق. ءتولقۇجات تەكسەرەتىن ورىندا قىتايدان كەلە جاتقانىمىزدى ايتىپ ەدىك، بىردەن بولەك بولمەگە وقشاۋلادى. مەكەنجاي، تەلەفون ءنومىرىمىزدى سۇراپ، جەدەل جاردەم شاقىردى. كەيىن اۋرۋحاناعا الىپ كەتتى.

- كارانتينگە الىناتىندارىڭ تۋرالى ەسكەرتىلدى مە؟

- جوق، ايتىلمادى. ءبىراق جاعدايعا قانىقپىز. ەلگە بۇرىن جەتىپ العان ستۋدەنتتەر 3 كۇندىك كارانتينگە جابىلعان. ءبىز كەلگەنشە مەرزىمى ەكى اپتا بولىپ وزگەرتىلىپتى.

- ول جاقتا ازاماتتارعا قانداي جاعداي جاسالعان؟

- قۇربىم ەكەۋمىزدى بولەك پالاتاعا جاتقىزدى. ودان ءبىر قادام اتتاپ شىعۋعا بولمايدى. ءىشى تازا. 3 مەزگىل تاماق بەرىلەدى، بولمە كۇنىنە ەكى مارتە تازارتىلادى، ماسكا كيگەن دارىگەرلەر جاعدايىمىزدى باقىلاپ وتىردى. اناليز ناتيجەسى 3 كۇننەن كەيىن بەلگىلى بولدى. دارىگەرلەر قورقۋعا نەگىز جوق ەكەنىن، ءبىراق تالاپقا سايكەس كارانتيندە 14 كۇن بولۋىمىز ءتيىس دەدى. - قىتايدان كەلدىڭ، كارانتيندە بولدىڭ... اينالاڭ قالاي قابىلدادى، ۇركە قاراعاندار بولعان جوق پا؟

- ونداي كەلەڭسىزدىكتەر كەزدەستى عوي. ءبىراق ول ۋاقىتشا نارسە دەپ ويلايمىن. تەك تۋىستارىم ۋايىمداپ، اسىعا كۇتكەنى بولماسا، قازىر ءبارى جاقسى. ايتپاقشى، 9 - ناۋرىزدا ساباق باستالدى. قاشىقتان، ۆيدەوبايلانىس ارقىلى ءبىلىم الىپ جاتىرمىز. كىتاپتار، قاجەتتى لەكسيالاردى ەلەكتروندى نۇسقادا پوشتامىزعا جىبەرەدى. ارنايى باعدارلاما ارقىلى دارىسكە كىم قاتىستى، قاتىسپاعانىن ءبىلىپ، تۇگەندەپ وتىرادى. ەلدە ەكەنمىن دەپ ەركىنسۋگە بولمايدى، قىتاي ۋنيۆەرسيتەتتەرىندە تالاپ قاتاڭ...

ءلايلا قازىر الماتىدا وتباسىمەن بىرگە. ءتورت قابىرعاعا تەلمىرگەن كۇندەر ارتتا قالدى. قىتايعا ەندى قاشان باراتىنى دا ازىرگە بەلگىسىز... دەگەنمەن، قىتاي ەلىندەگى احۋال وڭالا باستاعانىن ايتىپ ءوتۋ كەرەك. كۇندەلىكتى ءولىم- ءجىتىم كورسەتكىشى 0,02 پايىزعا تومەندەگەن. سىرقاتتىلار ساۋىعىپ، ۋاقىتشا اشىلعان 14 اۋرۋحانا بىرىنەن سوڭ ءبىرى جابىلدى. وسى ورايدا، كوروناۆيرۋس ءبىر باسىن كەسسەڭ، ەكىنشىسى ءوسىپ شىعاتىن اجداھاداي ەلەستەيدى. ال ونى جەڭىپ شىعۋ كوپتەگەن مەملەكەت ءۇشىن سىناق.. .

اۆتورى: نازەركە توقجان

www.24.kz

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى