پرەزيدەنت جۇلدەسى ءۇشىن 35 بالۋان بەلدەسەتىن بولدى

وسىمەن سەگىزىنشى رەت وتەتىن باسەكەگە ەلىمىزدىڭ 14 وبلىسىنان، الماتى مەن استانا قالالارىنان، اسكەريلەر اراسىندا ىرىكتەۋدەن وتكەن، 35 ۇزدىك بالۋان قاتىسادى.

جارىسقا قاتىسۋشى بالۋاندار استاناعا 28- ماۋسىمدا كەلەدى دەپ كۇتىلۋدە. ال، 29- ماۋسىمداعى ساعات 19:30 عا رەسمي سالماق ولشەۋ ءراسىمى بەلگىلەنىپ وتىر.

1- شىلدەدە 12:00 دە «قازاقستان بارىسى» تۋرنيرىنىڭ بالۋانداردىڭ جەرەبە تارتۋ ءراسىمى باستالماق. تارتىستى بەلدەسۋلەر جەتى ساعاتقا سوزىلادى دەپ جوسپارلانعان. شارا اياسىندا سپورتتىق سايىستارمەن قاتار كونسەرتتىك باعدارلاما مەن كەرەمەت شوۋ وتەدى دەپ كۇتىلۋدە.

«قازاقستان بارىسى» تۋرنيرىنىڭ بيىلعى جۇلدە قورى دا قوماقتى. جەڭىمپاز اتانعان بالۋانعا التىن بەلبەۋ مەن التىننان قۇيىلعان «تايتۇياق» تابىستالادى. ەكىنشى جانە ءۇشىنشى ورىن يەگەرلەرى سايكەسىنشە كۇمىس جانە قولا بەلبەۋلەرمەن ماراپاتتالادى.

سونىمەن قاتار، ءار بەلدەسۋدەگى جەڭىسكە - 100000 تەڭگە، Ⅲ ورىنعا - 1800000 تەڭگە (باپكەرىنە - 900000 تەڭگە)، Ⅱ ورىنعا - 5500000 تەڭگە (باپكەرىنە - 1800000 تەڭگە)، 1- ورىنعا - 25000000 تەڭگە (باپكەرىنە - 3500000 تەڭگە) بەرىلەدى.

مۇنىمەن قوسا، جىلداعى داستۇرگە ساي جانكۇيەرلەر اراسىندا سۋ جاڭا Renault Logan اۆتوكولىگى ويناتىلادى. بيلەتتەردى قازىردىڭ وزىندە «مەلومان» دۇكەندەرى جەلىسى مەن kassir.kz سايتىنان ساتىپ الۋعا بولادى. باعاسى 500 تەڭگە مەن 5000 تەڭگەنىڭ ارالىعىندا.

ايتا كەتەيىك، جەكپە-جەكتەر «Qazaqstan» ۇلتتىق ارناسى جانە «Qazsport» تەلەارناسىنان، سونىمەن قاتار رەسەيدىڭ «ماتچ! پلانەتا» جانە «بوكس ت ۆ»، تۇركيانىڭ «ترت اۆاز» تەلەارناسىنان تىكەلەي ەفيردە كورسەتىلەدى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى