ەسىل وزەنىندەگى تاڭعاجايىپ شوۋدى 35 مىڭ كورەرمەن تاماشالايدى دەپ كۇتىلۋدە
بۇل قازىرگى زامانعى لازەرلىك جانە پيروتەحنيكالىق تەحنولوگيالاردى سۋ بەتىندە ويناتاتىن ايرىقشا كورىنىس بولماق، دەپ حابارلايدى astana.kz.
ەسىل وزەنىنىڭ ۇستىندەگى جالپى اۋدانى 1000 تەكشە مەترلىك ساحناداعى سيمفونيالىق وركەستر شوۋ اسەرىن ارتتىرا تۇسەدى. ولار قازاقتىڭ حالىق اندەرى مەن زاماناۋي كلاسسيكالىق اۋەندەردى ورىندايدى.
ساحنانىڭ اينالاسىندا بيىكتىگى 12 مەتردى قۇرايتىن سۋبۇرقاقتار جاسالىپ، جاڭا لازەرلىك تەحنولوگيالاردىڭ كومەگىمەن جارقىن بەينەروليكتەر كورسەتىلەدى.
بۇل كورىنىستىڭ سوڭى ەسترادالىق- سيمفونيالىق وركەستردىڭ سۇيەمەلدەۋىمەن كوزدىڭ جاۋىن الار پيروتەحنيكالىق شوۋعا ۇلاسادى.
مونتاجداۋ جۇمىستارىنىڭ بارلىعى شىلدەنىڭ 1 دەيىن اياقتالادى دەپ كۇتىلۋدە.
- شارا تولىقتاي ساحنا ۇستىندە وتەدى. شوۋ 40 مينۋتقا جالعاسىپ، سوڭعى 10 مينۋتتا پيروتەحنيكالىق شوۋ مۋزىكامەن بىرگە استاسادى. قازىرگى كەزدە وڭدەۋ جۇمىستارى جۇرگىزىلىپ جاتىر، 1 ك م قاشىقتىقتا «فالكون» دەپ اتالاتىن وتە قۋاتتى زەنيتتى جارىق قۇرىلعىلارى ورناتىلادى، - دەيدى «نۇرلى ەسىل» شوۋىنىڭ پروديۋسەرى مالىك حاسەنوۆ.
مۋزىكالىق سۇيەمەلدەۋ اۆتورى - تانىمال كومپوزيتور رەنات گايسين.
استانا قالاسى مادەنيەت باسقارماسىنىڭ باسشىسى بولات ماجاعۇلوۆتىڭ ايتۋىنشا، كورەرمەندەرگە ارنالعان LED ەكراندار ورناتىلماق.
- ءبىر ۋاقىتتا بۇل شوۋدى 35 مىڭعا جۋىق كورەرمەن تاماشالاي الادى. لازەرلىك شوۋ مەن سۋبۇرقاقتاردى، ساحناداعى كورىنىستى قاشىقتا تۇرعان حالىق ارنايى ەكراننان كورەدى، - دەدى ب. ماجاعۇلوۆ.
