اسكەري قىزمەتشى 350 شاقىرىمدىق ۋلترامارافونعا اتتاندى
ساعادات نۇرماعامبەتوۆ اتىنداعى قۇرلىق اسكەرلەرى اسكەري ينستيتۋتى «ءالي» وقۋ-جاتتىعۋ ورتالىعىن قامتاماسىز ەتۋ روتاسىنىڭ جاۋىنگەرلىك كولىگىنىڭ كومانديرى راۋان ءابىلحانوۆ 48 ساعاتتا 350 شاقىرىم ەڭسەرمەك. ونىڭ جۇگىرۋ مارشرۋتى: «ءالي» وقۋ-جاتتىعۋ ورتالىعى - الماتى وبلىسىنىڭ شەلەك اۋىلى.
«3-سىنىپتى سەرجانت راۋان ءابىلحانوۆ الدىنا ماقسات قويدى. تاباندىلىق پەن جەڭىسكە دەگەن ەرىك-جىگەردىڭ ارقاسىندا ول رەكورد ورناتاتىنىنا سەنىمدىمىن. قۇرلىق اسكەرلەرى اسكەري ينستيتۋتىنىڭ جەكە قۇرامى ءۇشىن راۋان ماقساتقا جەتۋگە دەگەن سەنىم مەن ەرىك-جىگەردىڭ ۇلگىسى. ناعىز جاۋىنگەر وسىنداي بولۋى كەرەك. وعان ساتتىلىك تىلەيمىز»، - دەدى سپورتشىعا قورعانىس مينيسترلىگى اسكەري ءبىلىم جانە عىلىم دەپارتامەنتىنىڭ باستىعى جۇمابەك احمەتوۆ.
راۋان ءابىلحانوۆتىڭ جەڭىل اتلەتيكامەن اينالىسقانىنا 10 جىلدان استى. ول - الماتىدا جانە قارۋلى كۇشتەردە وتكەن مارافونداردىڭ جەڭىمپازى. جاۋىنگەرلىك دايىندىق پەن ۇلگىلى اسكەري تارتىپتەگى جوعارى كورسەتكىشتەرى ءۇشىن كوپتەگەن ماراپاتقا يە.
مارافون قاشىقتىعى باعىتىندا سپورتشىعا اسكەري ينستيتۋت دارىگەرلەرىنىڭ بريگاداسى، دوستارى، ارىپتەستەرى جانە قازاقستاننىڭ رەكوردتار كىتابىنىڭ وكىلدەرى ىلەسەدى.
اسكەري قىزمەتشىنىڭ بۇل باستاماسىن جانۇياسى دا قولدايدى. ءابىلحانوۆتار التى قىز بەن ۇل تاربيەلەپ، جۋىردا تاعى ءبىر نارەستە كۇتىپ وتىرعان ۇلگىلى وتباسى.
