قاراعاندى وبلىسىنان مەسساعا 350 دەن استام كاتوليك ارنايى كەلگەن
«مەن قاراعاندىدان ريم پاپاسىنىڭ قاتىسۋىمەن وتەتىن قاسيەتتى مەسساعا قاتىسۋ ءۇشىن كەلدىم. كاتوليكتەردىڭ شىركەۋى الەمنىڭ ءار تۇكپىرىندە بار. ريم پاپاسىن كورۋ مۇمكىندىگى ءبارىمىزدى وسى جەردە توعىستىرىپ وتىر. ءبىز ءۇشىن كاتوليك شىركەۋىنىڭ باسشىسىمەن بىرگە مەسساعا قاتىسۋ ەرەكشە سىي دەۋگە بولادى»، - دەدى كاتوليك ءدىنىنىڭ وكىلى.
ايتۋىنشا، ول بۇل كۇنگە وتە تياناقتى دايىندالىپتى.
«ءبىرىنشى كەزەكتە ءوزىمىزدى رۋحاني تۇرعىدا دايىندادىق. سودان كەيىن بارىپ ساپاردى ۇيىمداستىرۋمەن اينالىستىق. ويتكەنى قاراعاندىدان قۇلشىلىق ەتۋشىلەر توپ بولىپ كەلدى. مۇندا وسى شاراعا ءبىزدىڭ وبلىستان ارنايى كەلگەن 350 دەن استام ادام ءجۇر. مەن ءۇشىن بۇل ريم پاپاسىنىڭ قاتىسۋىمەن وتەتىن العاشقى مەسسا. تانىستارىمنىڭ اراسىندا وسىنداي شاراعا قاتىسۋ ءۇشىن ۆاتيكانعا ارنايى بارعان ادامدار بار. مەن دە بۇعان دەيىن ريم پاپاسىن كورگەنمىن. ءبىراق ول وتكىزەتىن مەسساعا ءبىرىنشى رەت قاتىسقالى تۇرمىن»، - دەيدى سوفيا گوتوۆسكايا.
ايتا كەتۋ كەرەك، ەكى كۇنگە سوزىلاتىن سەزگە 50 ەلدەن 100 دەن استام دەلەگاتسيا، ونىڭ ىشىندە يسلام، حريستيان، بۋدديزم، يۋدايزم، يندۋيزم، داوسيزم، زورواستريزم، سينتويزم دىندەرىنىڭ وكىلدەرى، سونداي-اق ساياساتكەرلەر مەن قوعام قايراتكەرلەرى، حالىقارالىق ۇيىم مۇشەلەرى كەلگەن.
ءدىني فورۋمعا ارنايى قوناق ريم پاپاسى فرانتسيسكتەن بولەك ءال-ازحاردىڭ جوعارعى يمامى احمەد موحاممەد احمەد ات-تايەب، يەرۋساليم پاتريارحى III تەوفيل، اشكەنازدىڭ باس راۆۆينى داۆيد لاۋ، ءيزرايلدىڭ باس سەفارد راۆۆينى يتسحاك يوسيف جانە باسقا دا ءدىني جەتەكشىلەر، ءبىرقاتار حالىقارالىق ۇيىمنىڭ وكىلدەرى قاتىسادى.
كەشە كەشكە پرەزيدەنت قاسىم-جومارت توقايەۆ سەزدىڭ ارنايى قوناعى ريم پاپاسى فرانتسيسكتى ەلوردا اۋەجايىنان كۇتىپ الدى.
كەيىننەن قازاقستان پرەزيدەنتى مەن ريم پاپاسى ازاماتتىق قوعام جانە ديپلوماتيالىق كورپۋس وكىلدەرىمەن كەزدەستى.
كەزدەسۋدە كاتوليك شىركەۋىنىڭ باسشىسى قازاقستاننىڭ ءولىم جازاسىنان باس تارتقانىنا جوعارى باعا بەرىپ، قازاقستان كونستيتۋتسياسىنىڭ نانىم-سەنىم بوستاندىعىنىڭ كەپىلى ەكەنىن اتادى.
ءدىن كوشباسشىسى فرانتسيسكتىڭ ەلىمىزگە مەملەكەتتىك ساپارى ريم پاپاسى يوانن II پاۆەل قازاقستانعا 2001-جىلى كەلگەننەن كەيىن العاش رەت ءوتىپ جاتىر. بۇگىن ول ەلوردادا مەسسا وتكىزەدى. وعان 3 مىڭعا جۋىق ادام قاتىسپاق.
