الماتىدا مامىر ايىنىڭ سوڭىندا 34 گرادۋسقا دەيىن ىستىق بولادى

بۇل تۋرالى قازگيدرومەت ءمالىم ەتتى، دەپ حابارلايدى قازاقپارات ءتىلشىسى.

سينوپتيكتەردىڭ بولجامىنا سايكەس، بۇل ايدا الماتىدا ورتاشا اۋا تەمپەراتۋراسى +17,5 گرادۋس بولادى.

«العاشقى ونكۇندىكتىڭ باسىندا تەمپەراتۋرا تۇندە +10+15 تەن +5+10 گرادۋسقا دەيىن، كۇندىز +27+32 دەن +20+25 گرادۋسقا دەيىن اۋىتقيدى دەپ كۇتىلەدى. ونكۇندىكتىڭ سوڭىندا تۇندە +5+10، كۇندىز +15+20 گرادۋسقا دەيىن تومەندەۋى ىقتيمال»، - دەدى «قازيدرومەت» رم ك ديرەكتورى مارينا شميدت.

اۋا رايىن ۇزاق مەرزىمدى بولجاۋ باسقارماسىنىڭ باستىعى جۇلدىز يسابەكوۆانىڭ ايتۋىنشا، ەكىنشى ونكۇندىكتىڭ باسىندا اۋا تەمپەراتۋراسى تومەندەيدى: تۇندە 0,+5 دەيىن، توپىراق بەتىندە 3 گرادۋسقا دەيىن، كۇندىز +10+15 گرادۋسقا دەيىن.

«ال ونكۇندىكتىڭ ورتاسىندا تەمپەراتۋرا تۇندە +8+13، كۇندىز +20+25 گرادۋسقا كوتەرىلەدى دەپ كۇتىلۋدە. كەيىن تۇندە +3+8، كۇندىز +15+20 گرادۋسقا دەيىن تومەندەيدى. ونكۇندىكتىڭ سوڭىندا تەرمومەتر باعانى بىرتىندەپ جوعارىلايدى. ءۇشىنشى ونكۇندىكتە اۋا تەمپەراتۋراسى تۇندە +15+20، كۇندىز +29+34 گرادۋسقا دەيىن كوتەرىلەتىنى بولجانۋدا. مامىر ايىندا جاۋىن- شاشىن مولشەرى نورمادان جوعارى تۇسەدى. جاڭبىر، نايزاعاي جانە 15-20 م/س ەكپىندەگى جەل ءجيى بولادى دەپ كۇتىلەدى. ەكىنشى ونكۇندىكتىڭ ورتاسى مەن سوڭىندا تۇمان ءتۇسۋى ىقتيمال»، - دەدى جۇلدىز يسابەكوۆا.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى