استانادا سۋ تاسقىنى قاۋپى بار 34 اۋماق بەلگىلەندى
وزەكتى ماسەلە جايلى ەلورداداعى كوشپەلى بريفينگ كەزىندە استانا قالالىق توتەنشە جاعدايلار دەپارتامەنتى باستىعىنىڭ مىندەتىن اتقارۋشى مارعۇلان امانبايەۆ ايتىپ بەردى، دەپ حابارلايدى قازاقپارات ءتىلشىسى.
«بۇگىنگى كۇنى استانا قالاسىنىڭ اكىمدىگىمەن بىرلەسە وتىرىپ، كوكتەمگى سۋ تاسقىنىنىڭ الدىن الۋ بويىنشا جۇمىس جوسپارى قۇرىلدى. ول جوسپاردا 255 تارماق بار. استانادا كوبىنەسە قار سۋىنان ماسەلە تۋىندايتىنىن بىلەسىزدەر. 2017-2018-جىلدارى بولعان جاعدايلاردى تالداي وتىرىپ، قار سۋى الىپ كەتۋى مۇمكىن دەگەن 34 اۋماقتى بەلگىلەپ وتىرمىز. ول اۋماقتارعا تۇرعىن ۇيلەر، ءوندىرىس ايماقتارى جاتادى»، - دەيدى استانا قالالىق توتەنشە جاعدايلار دەپارتامەنتى باستىعىنىڭ مىندەتىن اتقارۋشى مارعۇلان امانبايەۆ.
دەپارتامەنت وكىلىنىڭ ايتۋىنا قاراعاندا، قازىرگى تاڭدا استانا سۋ قويماسىندا 245 ميلليون تەكشە سۋ بار. قويمانىڭ ماكسيمالدى سۋدى ۇستاپ تۇرۋ مۇمكىندىگى - 410 ميلليون تەكشە.
«قويمادان كەلەتىن سۋ ەلورداداعى كونتررەگۋلياتورعا كەلىپ تۇسەدى. ول جەردە قازىرگى تاڭدا سۋ جوق. ياعني، سۋدىڭ ورنى بوس. قازىر استانا سۋ قويماسىنان جىبەرىلىپ جاتقان سۋدىڭ كولەمى 4 ميلليون تەكشە عانا. ءبىرىنشى بەكەت ارقىلى ول سۋ ەسىل وزەنىنە اعىزىلادى. جالپى، استانا قالاسىنىڭ ت ج د مەن اكىمدىگى، باسقا دا قۇرىلىمدار ەلوردادا سۋ تاسقىنىنىڭ الدىن الۋ ءۇشىن ۇلكەن جۇمىس اتقاردى. ەلوردادا وتكەن «كوكتەم-2019» رەسپۋبليكالىق وقۋ-جاتتىعۋدا استانا قالاسى شارۋاشىلىقتارىنىڭ تەحنيكالارىن، ادامدارىنىڭ دايىندىعىن پىسىقتاپ الدىق. مىڭنان اسا ادام مەن 600 تەحنيكانىڭ دايىن تۇرعانىن كوردىك»، - دەيدى ول.
مارعۇلان امانبايەۆتىڭ سوزىنە سەنسەك، وسى ۋاقىتقا دەيىن استانا قالاسىنان پوليگوندارعا 2 ميلليون توننادان ارتىق قار شىعارىلعان. 500 دەن اسا تەحنيكا مەن 300 گە تارتا ادام قار شىعارۋ جۇمىسىمەن اينالىسىپ جاتىر.
«استانا قالاسى بويىنشا ارىقتار مەن نوسەر كاناليزاتسيالارىنىڭ قۇبىرىن تازارتۋ جۇمىستارى دا قىزۋ ءجۇرىپ جاتىر. 22 مىڭ شاقىرىمدىق ارىق تازارتىلىپ، قاتقان مۇزداردىڭ ءبارى الىنىپ جاتىر. ءاربىر جەكە تۇرعىن ۇيدەگى ازاماتتار اۋلاداعى قاردى سىرتقا شىعارىپ بەرسە بولدى، كوممۋنالدىق ۇيىمدار ول قاردى قالا شەتىندەگى پوليگونعا تاسيدى. ەلوردادا ونداي 4 پوليگون بار. استانا قالاسىنان 2 ميلليون توننادان ارتىق قار شىعارىلعانىن اتاپ وتكەن ەدىك. بۇل كورسەتكىش بىلتىرعىدان شامامەن 300-400 مىڭ تەكشەگە ارتىق»، - دەيدى مارعۇلان امانبايەۆ.
