بيىل 34 اسكەري قالاشىق اباتتاندىرىلاتىن بولادى
وسى جىلعى جوسپارعا ەلىمىزدىڭ ءار ءوڭىرىنىڭ 34 نىسانىندا ورتاشا جانە كۇردەلى جوندەۋدى جۇزەگە اسىرۋ ەنگىزىلگەن، دەپ حابارلادى ق ر ق م باسپا ءسوز قىزمەتى.
قازىرگى ۋاقىتتا سەگىز اسكەري قالاشىقتا، ونىڭ ىشىندە 44803, 30217 جانە 32363 اسكەري بولىمدەرىنىڭ بازاسىندا اسفالت-بەتوندى جابىندى كۇردەلى جوندەۋ باستالدى، تاعى دا 26 اسكەري قالاشىقتا جولداردى ورتاشا جوندەۋ، سونداي-اق 10 نىساندا قورشاۋ قۇرىلىسىن ورناتۋ جۇرگىزىلۋدە.
سونىمەن قاتار، اسكەري قالاشىقتاردان تىس تۇراتىن اسكەري قىزمەتشىلەردىڭ تۇرعىن ۇيلەرىن جوندەۋ جالعاسۋدا. بۇگىنگى كۇنى اقمول كەنتىندە جالپى اۋدانى 3390 شارشى مەتر 42 پاتەرلى ءۇي تاپسىرىلۋعا دايىن، ال اياگوز قالاسىندا جالپى اۋدانى 5790 شارشى مەتر 90 پاتەرلى تۇرعىن ءۇيدىڭ جوندەۋ جۇمىسى جالعاسۋدا.
كۇردەلى جوندەۋ اياسىندا مۇندا تەرەزەلەر مەن ەسىكتەردى، جابىندى، ينجەنەرلىك جەلىلەردى اۋىستىرۋ جانە قاسبەتتى جوندەۋ كوزدەلگەن. كۇردەلى جوندەۋ قازاقستاندىق اسكەري قىزمەتشىلەردى تۇرعىن ۇيمەن قامتاماسىز ەتۋ جۇيەسىنىڭ ءبىر بولىگى بولىپ تابىلادى. تۇرمىستىق جاعدايدى جاقسارتۋ ماقساتىندا دايىن باسپانا سالۋ جانە ساتىپ الۋمەن قاتار اسكەري قىزمەتشىلەر تۇرىپ جاتقان پاتەرلەردى جوندەۋ جۇزەگە اسىرىلىپ جاتىر.
