قۇرمانعازىنى ماسقارالاعاندار 34 ميلليون تەڭگە ايىپپۇل تولەيتىن بولدى

ەلدىڭ ابىرويىن تاپتاعان پوستەردى جاريالاعان Havas Worldwide Kazakhstan جارناما اگەنتتىگى 34 ميلليون تەڭگە مورالدىق شىعىن وتەيتىن بولدى.

ەستەرىڭىزگە سالا كەتەيىك، المالى اۋداندىق سوتىنا وسى ماسەلە بويىنشا قۇرمانعازى اتىنداعى ۇلتتىق كونسەرۆاتوريانىڭ ۇجىمى ارىز تۇسىرگەن بولاتىن. وندا وقۋ ورنى ۇجىمى اگەنتتىكتەن 34 ميلليون تەڭگە، سونداي-اق رەسپۋبليكالىق ب ا ق ارقىلى كوپشىلىكتەن كەشىرىم سۇراۋىن تالاپ ەتكەن.

ستۋدەنتتەر مەن وقىتۋشىلاردىڭ ارىزىندا جارناما رەيتينگىن قۋعان پوستەر اۆتورلارىنىڭ ۇلى ونەر قايراتكەرلەرىن قورلاعانى ايتىلعان.

Havas Worldwide Kazakhstan جارناما اگەنتتىگىنىڭ باس ديرەكتورى داريا حاميتجانوۆا كومپانيانىڭ قۇرمانعازى اتىنداعى كونسەرۆاتورياعا ميلليونداعان مورالدىق شىعىن وتەيتىن اقشاسى جوق ەكەنىن ايتتى.

"34 ميلليون تەڭگە - ورتا بيزنەس سۋبەكتىسى ءۇشىن وتە ۇلكەن سوما، ونداي اقشا جوق. بىزدەن تەك جازۋ ستولىمىز، قاعاز-قالامىمىزدى تاركىلەمەسە، باسقا قالاي تولەيتىنىمىزدى بىلمەيمىن»، - دەيدى كومپانيا جەتەكشىسى.

قورعاۋشى جوحار وتەبەكوۆ بولسا، اتالعان سوت ۇكىمىنە اپەللياتسيالىق شاعىم تۇسىرۋگە ىنتالى ەكەندىگىن جەتكىزدى.

بۇعان دەيىن سوتتىڭ پۋشكين مەن قۇرمانعازىنىڭ ءسۇيىسىپ تۇرعانىن بەينەلەگەندەرگە ايىپپۇل سالعانى حابارلانعان بولاتىن. اكىمشىلىك ارىزدى الماتى قالالىق ىشكى ساياسات باسقارماسى ۇسىندى. سوت جارناما اگەنتتىگىنىڭ باس ديرەكتورىنا 129640 تەڭگە (70 ا ە ك)، اگەنتتىككە 185200 تەڭگە (100 ا ە ك) كولەمىندە ايىپپۇل سالدى.

ەسكە سالا كەتەيىك، "ستۋديا 69" كلۋبىن جارنامالايتىن پوستەر الەۋمەتتىك جەلىلەردە 24 تامىزدان باستاپ تارالدى. بۇل سۋرەت قوعام وكىلدەرىنىڭ نارازىلىعىن تۋعىزدى، نارازى بولعاندار پوليتسياعا شاعىمدانىپ، پرينت اۆتورلارىن جاۋاپكەرشىلىككە تارتۋدى تالاپ ەتتى.

كومپانيا رەسمي تۇردە كەشىرىم سۇراپ، پوستەردىڭ باسىپ شىعارىلمايتىنىن جانە قايتا جاريالانبايتىنىن ايتتى.

اۆتور: گۇلميرا عوسمانالي

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى