قازاقستاندا اقبوكەندەردىڭ سانى 334 مىڭعا جەتتى
ق ر ەكولوگيا، گەولوگيا جانە تابيعي رەسۋرستار ءمينيسترى ماعزۇم مىرزاعاليەۆ وسىنداي مالىمەت كەلتىردى، دەپ حابارلايدى قازاقپارات ءتىلشىسى.
«جانۋارلار دۇنيەسى سالاسىندا سيرەك كەزدەسەتىن جانە جويىلىپ بارا جاتقان تۇياقتى جانۋارلار، اسىرەسە، اقبوكەندەردى ساقتاۋ جانە كوبەيتۋ جۇمىستارى جۇرگىزىلۋدە. اقبوكەندەردى كوبەيتۋدىڭ وڭ ديناميكاسى بايقالىپ وتىر. اقبوكەن سانى بىلتىرعى جىلمەن سالىستىرعاندا 55 پايىزعا ءوسىپ، 334 مىڭ باسقا جەتتى»، - دەدى ماعزۇم مىرزاعاليەۆ و ك ق- دا وتكەن باسپا ءسوز ءماسليحاتىندا.
الايدا مينيستر اقبوكەندى اۋلاۋ وقيعاسى ازايماي تۇرعانىن ايتادى. ماسەلەن، بيىل 63 براكونەرلىك فاكتىسى انىقتالىپ، 1058 ءمۇيىز جانە 650 ۇشاسى تاركىلەنگەن.
«وكىنىشكە قاراي، بۇگىن دە براكونەرلىك ۇيىمداسقان قىلمىس تۇرىنە اينالدى. ونى 3 ينسپەكتوردىڭ مەرت بولۋى، سوعان بايلانىستى تۋىنداعان قوعامدىق پىكىرلەر ايعاقتايدى. براكونەرلىككە قارسى ءىس-قيمىل جانە زاڭنامانى قاتاڭداتۋ جونىندەگى شارالاردى كۇشەيتۋ ماسەلەسى مەملەكەت باسشىسىنىڭ ەرەكشە باقىلاۋىندا. مينيسترلىك باس پروكۋراتۋرامەن، ىشكى ىستەر مينيسترلىگى جانە ۇلتىق قاىپسىزدىك كوميتيتەتىمەن بىرلەسىپ ءتيىستى شارالاردى پىسىقتادى. قازىر پارلامەنت سەناتىندا قىلمىستىق زاڭنامانى جەتىلدىرۋ ماسەلەلەرى جونىندەگى زاڭ جوباسى قاراستىرىلىپ جاتىر. وندا مەملەكەتتىك ينسپەكتورلارعا قاتىستى كۇش قولدانعانى ءۇشىن جاۋاپكەرشىلىك ايتارلىقتاي كۇشەيەدى»، - دەدى ول.
ماعزۇم مىرزاعاليەۆ زاڭنامانى جەتىلدىرۋمەن قاتار، ينسپەكتورلاردىڭ بىلىكتىلىگىن ارتتىرۋ مەن ماتەريالدىق-تەحنيكالىق جاراقتاندىرۋ جۇمىستارى قولعا الىنعانىن، ءتيىستى وقۋ كۋرستارى مەن ترەنينگتەر وتكىزىلگەنىن ايتىپ ءوتتى.
«قازىر مەملەكەت باسشىسى ەكولوگياعا اسا ءمان بەرىپ وتىرعانى بەلگىلى. حالىق ءۇشىن دە ماڭىزى زور بۇل جۇمىستار الداعى جىلى ءوز جالعاسىن تابادى. بارلىق قويىلعان مىندەتتەر مەن ماقساتتار 100 پايىز ىسكە اسادى دەپ سەنەمىن»، - دەدى مينيستر.
