تۇركيادا كەشەگى جەر سىلكىنىسىنەن كەيىن ءۇيىندى استىنان 32 ادام قۇتقارىلدى
تۇركيا ۇكىمەتى جانىنداعى توتەنشە جاعدايلاردىڭ الدىن الۋ جانە جويۋ باسقارماسىنىڭ (AFAD) باسشىسى يۋنۋس سەزەردىڭ ايتۋىنشا، جەراستى دۇمپۋلەرى 29 تۇرعىن ءۇيدىڭ قۇلاۋىنا اكەلىپ سوقتىردى. سالدارىنان ءبىر ادام قازا تاۋىپ، 110 تۇرعىن جاراقات الدى.
جەر سىلكىنىسىنەن قيراعان ەكى ءۇيدىڭ ءۇيىندى استىنان ادامداردى قۇتقارۋ جۇمىستارى جالعاسۋدا جانە وعان 657 ادام جۇمىلدىرىلدى.
سونداي-اق، تۇركيانىڭ توتەنشە جاعدايلاردىڭ الدىن الۋ جانە جويۋ باسقارماسىنىڭ باسشىسى ازاماتتارعا قيراعان ۇيلەردەن اۋلاق بولۋ كەرەكتىگىن ەسكە سالدى.
«اپات ايماعىندا تۇراتىن بارلىق ازاماتتىڭ ۇيالى تەلەفوندارىنا SMS-حابارلاما جىبەرىلدى. جەر ارا- تۇرا سىلكىنىپ جاتىر، زاقىمدانعان ۇيلەر قۇلاۋى مۇمكىن»، - دەدى يۋنۋس سەزەر.
ايتا كەتسەك، تۇركيانىڭ مالاتيا پروۆينسياسىندا 5,6 بالدىق جەر سىلكىنىسى بولدى.
ءزىلزالا جەرگىلىكتى ۋاقىت بويىنشا ساعات 12:04 تە تىركەلگەن. ونىڭ ەپيسەنترى يەشيليۋتر اۋدانىندا بولدى. جەر سىلكىنىسىنىڭ وشاعى 6,96 ك م تەرەڭدىكتە جاتىر.
