شوشقاعا بەرەتىن دارىمەن قويىن ەمدەگەن شارۋا 320 باس مالىن ءولتىرىپ الدى
تۇركىستان وبلىسىندا 20 جىلدان بەرى اسىل تۇقىمدى قوي وسىرۋمەن اينالىساتىن شارۋا قوجالىعى ءبىر كۇندە 300 دەن استام مالىنان ايىرىلىپ قالدى. ءىشى وتكەن ۇساق مالىن ەمدەۋ ءۇشىن شارۋا ۆەتەرينارعا ەمەس، شىمكەنتتەگى ءدارىحاناعا بارعان. شارۋا ساتۋشىنىڭ شوشقاعا بەرەتىن «اشتيل» ۇنتاعى اۋرۋ قويلارعا ەم بولادى دەگەن سوزىنە سەنىپ، ۇنتاقتى ساتىپ العان.
«سۇيىقتىقتان قازىرگى كۇنى قايتىپ كەتتى بۇل. ماعان «ۇنتاق ءارى ارزان تۇسەدى، ءبىر كەلىسىن 10 ليتر سۋعا قۇياسىڭ دا قويعا 10 گرامنان، قوزىعا 5 گرامنان بەرەسىڭ» دەدى. بۇل قوزى جاس قوي ءالى دەپ ەدىم، «وندا 3 گرام سال» دەدى. سونىمەن 700 باس قويىم انالىق باس، 500 قوزىعا سالدىم، 7 دەن باستادىم، 10 دا ءبىتتىم دارىلەپ ءبارىن. كەشكى 10 نان كەيىن توقتاماي ولە باستادى. قارىندارى كەبەدى، بولدى، ەشتەڭەگە كونبەيدى، توپ-توپ ءار جەردە ولە باستادى»، - دەيدى شارۋا قوجالىقتىڭ يەسى سامات كادىروۆ,.
وسىلايشا، شارۋا ءبىر ءتۇننىڭ ىشىندە ميلليونداپ شىعىنعا باتتى. ال امان قالعان قويلاردىڭ دا سىلەكەيى شۇبىرىپ، جەم جەۋدەن قالىپتى.
ۇساق مالىنان ايىرىلعان شارۋا پوليتسيا مەن ۆەتەرينارلاردى شاقىرتىپتى. الايدا ۆەتەرينالارلار ەشتەڭە ىستەي المايتىنىن ايتقان كورىنەدى.
«سول دارىدەن بولعان، بۇل شوشقا مەن تاۋىققا ارنالعان دەپ ءبارى ايتتى. بۇنى ەكى ەسەلىك دوزادان بولعان بۇل، ءىشىن كۇيدىرىپ جىبەردى، «ويباي، ءبارىن رەتتەيمىز» دەپ ءبارىن تۋشاسىن الدى دا كەتتى، سودان بىزدەن ەشقانداي سول دارىدەن ءولدى دەگەن ەكسپەرتيزا دالەلدەي المايمىز دەپ ءبارى جوق بولدى»، - دەيدى سامات كادىروۆ.
شارۋا شىمكەنتتەگى ۆەتەريناريالىق ءدارىحاناعا بارعاندا ساتۋشىلار كاسىپكەرمەن داۋلاسىپ، جاۋاپ بەرۋدەن باس تارتقان. ال مالدىڭ ولىگىن زەرتحانادا تەكسەرىپ جاتقان ماماندار «كاسىپكەردىڭ ۆەتەرينارعا ەمەس، ساتۋشىعا جۇگىنگەنى قاتەلىك بولدى» دەپ وتىر.
«ءبىز تاراپىمىزدان لابوروتوريادان ەنتەروتوكسيميا جۇقپالى اۋرۋعا تەكسەرۋگە جىبەردىك. ول 9 كۇندە ونىڭ ناتيجەسى كەلەدى»، - دەيدى تۇركىستان وبلىستىق ۆەتەريناريا قىزمەتى باسشىسىنىڭ ورىنباسارى المەت ورازبەكوۆ.
شارۋا ەندى ساراپتامانىڭ ناتيجەسىن كۇتىپ وتىر. ەگەر 320 باس قويدىڭ راسىمەن دارىدەن ولگەنى انىقتالسا، شىعىنىن سوت ارقىلى ءوندىرىپ الۋعا نيەتتى.
