ۋلترامارافونشى زاڭعار الكەنوۆ 320 شاقىرىمدى 45 ساعاتتا جۇگىرىپ ءوتتى
قاراعاندى گارنيزونىنىڭ اسكەري پوليتسيا وفيتسەرى، كاپيتان زاڭعار الكەنوۆ 45 ساعاتتا «جەزقازعان - جاڭاارقا» باعىتى بويىنشا 320 شاقىرىم قاشىقتىقتى جۇگىرىپ ءوتتى. ول 27-مامىردا جەزقازعان قالاسىنان باستاپ، 29-مامىردا تۋعان جەرى جاڭارقا اۋدانىندا بەلگىلەنگەن ۋاقىتتان ءۇش ساعات بۇرىن مارافوندى اياقتادى.
- مەن ءۇشىن ءار مارافون - بەرىكتىكتى سىناۋ. 320 شاقىرىم قاشىقتىقتى باعىندىرعاندا ءوز مۇمكىندىكتەرىمدى تاعى شىڭداپ كوردىم. بۇل مەن ءۇشىن وڭاي بولماعانىن مويىندايمىن، - دەپ ءبولىستى اسكەري قىزمەتشى.
اتالمىش مارافون ناۆيگاتسيالىق پلاتفورما كومەگىمەن، ونىڭ باعىتى مەن اراقاشىقتىقتى، ءوتۋ ۋاقىتى ونلاين رەجيمدە باقىلاندى.
كاپيتان زاڭعار الكەنوۆ - قازاق كۇرەسىنەن سپورت شەبەرى جانە دزيۋدو مەن سامبودان سپورت شەبەرىنە ۇمىتكەر. ونىڭ باعىندىرعان العاشقى قاشىقتىعى 15 شاقىرىم، سودان كەيىن – 21، 42، 75, 83-كە جەتتى. وتكەن جىلدىڭ قىركۇيەگىندە اسكەري قىزمەتشى 35 ساعات 11 مينۋت 52 سەكۋندتا 200 شاقىرىمدى جۇگىرىپ وتكەن.
بۇل جۇگىرۋدى اسكەري قىزمەتشى قازاقستان تاۋەلسىزدىگىنىڭ 30 جىلدىعىنا جانە قارۋلى كۇشتەردەگى اسكەري پوليتسيا ورگاندارىنىڭ قۇرىلعانىنا 24 جىل تولۋىنا ارنادى. ەسكە سالا كەتەيىك، ءبىز بۇعان دەيىن ۋلترامارافونشى زاڭعار الكەنوۆتىڭ قازاقستاننىڭ رەكوردتار كىتابىنا ەنگەنىن جازعان ەدىك.
