الماتىدا ءبىر تۇندە بالالارى ءۇشىن 312 اتا-انا اكىمشىلىك جاۋاپقا تارتىلدى
الماتى قالاسى پوليتسيا دەپارتامەنتىنىڭ جەرگىلىكتى پوليتسيا قىزمەتى باسقارماسىنىڭ يۋۆەنالدى پوليتسيا ءبولىمىنىڭ باستىعى جاننا شونجانوۆانىڭ ايتۋىنشا، شارا بارىسىندا قۇقىق بۇزعان 376 جاس ءوسپىرىم انىقتالدى، ونىڭ 312 ءسى تۇنگى ۋاقىتتا ىشكى ىستەر ورگاندارىنا جەتكىزىلدى، قاراۋسىز قالعان 40 بالا بالالاردى قورعاۋ ورتالىعىنا ورنالاستىرىلدى. ارنايى ەسەپكە 25 جاس ءوسپىرىم تىركەلىپ، بالا تاربيەسىندە ءوز مىندەتتەرىن ورىندامايتىن 35 اتا-انا انىقتالدى.
«تۇنگى ۋاقىتتا اتا-انالارىنىڭ نەمەسە ولاردىڭ زاڭدى وكىلدەرىنىڭ قاراۋىنسىز كوڭىل كوتەرۋ ورتالىقتارىندا جۇرگەن بالالار ءۇشىن 312 اتا-انا اكىمشىلىك جاۋاپقا تارتىلدى. ەسكەرتە كەتەيىك، كەز كەلگەن اتا-انا ءوز بالالارىن قاراۋسىز قالدىرماۋ كەرەك. سەبەبى، بالالار ءارتۇرلى جاعدايعا دۋشار بولۋى نەمەسە قۇقىق بۇزۋشىلىققا جول بەرۋى مۇمكىن. سونداي-اق، جاس وسپىرىمدەرگە قاتىستى قىلمىس جاسالۋ قاۋپى بار. بالا تاربيەسىنە ۇلكەن جاۋاپكەرشىلىكپەن قاراۋ كەرەك»، - دەدى جاننا شونجانوۆا.
