جاس انالارعا ارنالعان «انا ءۇيى» جوباسى اياسىندا 312 بالا مەن انا پانا تاپتى
بۇل تۋرالى جوبا اۆتورى، تانىمال كاسىپكەر ايدىن راحىمبايەۆ ءوزىنىڭ فەيسبۋكتەگى پاراقشاسىندا ءمالىم ەتتى.
«سوڭعى كەزدە ءبىزدىڭ كرەمەر ۆيكتور، جاقسىبەكوۆ داۋرەن، الديار قازتايەۆ، قايرات شارىپبايەۆ سياقتى كاسىپكەرلەردىڭ ارقاسىندا «انا ءۇيى» تاعى دا كوكشەتاۋ، پاۆلودار، پەتروپاۆل جانە تاراز قالالارىندا اشىلدى. ناتيجەسىندە بارشا قازاقستان بويىنشا وسىنداي 20 ءۇي جۇمىس جاساۋدا»، - دەيدى ول.
جاقىن ۋاقىتتارى اقتاۋ قالاسىندا جانە الماتى، اقتوبە مەن تالدىقورعاننان تاعى ءبىر-ءبىر ۇيدەن اشىلادى دەپ جوسپارلانۋدا. ونىڭ ايتۋىنشا، ورتالىقتارعا اعىلعان جاس انالاردىڭ لەگى تولاستار ەمەس.
«2013 - جىلى جوبانى باستاعان كەزدە 4 ءۇي اشىلعان بولاتىن. جەتىمدىكتىڭ ازابىنان 34 بالانى امان ساقتاپ قالدىق. كەيىن قازاقستانداعى كاسىپكەرلەردى وسى جوباعا اتسالىسۋعا شاقىردىق. 2014 - جىلدىڭ 7 ايى ىشىندە ءبىزدىڭ ۇيلەردە 278 انا نارەستەلەرىمەن پانا تاپتى! جالپى جوبا اياسىندا نارەستەلى بولعان 312 اناعا كومەك جاسالدى. مەنىڭشە بۇل ءبىزدىڭ جوبامىزدىڭ جەتىستىگى، قازاقستان كاسىپكەرلەرىن جۇمىلدىرۋ بارىسىندا كەلگەن جەمىسىمىز. دوستار، قازىر ءبىز ەلدىڭ ءار وبلىسىندا وسىنداي ۇيلەردى اشقاننان كەيىن سۇرايتىنىمىز، اركىمنىڭ قۇلاعىنا جەتسىن، بولاشاق انالاردىڭ تەرىس قادام جاساماۋىنا كوپ ۇلەس قوسا الامىز»، - دەيدى ا. راحىمبايەۆ.
ايتا كەتەيىك، بۇل جوبا اياسىندا ءتۇرلى قيىن جاعدايلارعا بايلانىستى جاڭا تۋعان بالاسىن تاستاپ كەتۋدى ويلاپ جۇرگەن نەمەسە بولاشاقتا بالالار ۇيلەرىنە تاپسىرۋعا بەل بۋعان جۇكتى ايەلدەر وسى ۇيلەردە پانا تابا الادى.
«ادەتتە ولار العاش انا اتانعالى جاتقان، ءوزىنىڭ جۇكتىلىگىمەن جالعىز قالعان جاس قىزدار. بالاسىنان باس تارتىپ، كەيىن ءومىر بويى وكىنىپ جۇرەدى. ءبىز ولاردى ءبىر نەمەسە ءبىر جارىم جىلعا دەيىن وسى ۇيلەرگە قامقورلىعىمىزعا الىپ وتىرامىز. اسپازشى، تىگىنشى، شاشتاراز جانە وزگە دە ماماندىقتارعا باۋلىپ، ءومىردىڭ قيىندىقتارىن ەڭسەرۋگە كومەكتەسەمىز. ادەتتە العاشقى ايلاردا-اق جاس انانىڭ كوڭىلى ورنىنا ءتۇسىپ، نارەستەلەرىمەن بىرگە ءوزىنىڭ تۋعان-تۋىستارىنا قايتا ورالىپ جاتادى»، - دەپ جازادى جوبا اۆتورى.
اۆتور: جاسۇلان جولدىبايەۆ
