ا ق ش- تىڭ مەملەكەتتىك قارىزى 31,1 تريلليونعا جەتتى
ۇكىمەت پاندەميا كەزىندە ەڭبەك نارىعىنداعى قيىندىقتاردى ەڭسەرىپ، ەكونوميكانى تۇراقتاندىرۋ ءۇشىن قوماقتى قارىز الدى. جۇمىسسىز قالعان حالىققا تريلليوندار تاراتىلىپ، ەكونوميكادا اقشا تىم كوبەيىپ كەتتى.
اقشا كوبەيگەن سوڭ بارلىق سالادا باعا ءوستى. باعانى تۇراقتاندىرۋ ءۇشىن ۇلتتىق قورداعى التىندى پايدالانا باستادى.
فەدەرالدى بيۋجەتكە جاۋاپتى كوميتەتتىڭ ەسەبى بويىنشا دجو بايدەننىڭ قازىرگى ساياساتى مەملەكەتتىك قارىزدى الداعى ون جىلدا تاعى 4,8 تريلليون دوللارعا ەسەلەۋى مۇمكىن.
دونالد ترامپ اكىمشىلىگى پايىزدىق مولشەرلەمە قازىرگىدەن اناعۇرلىم تومەن كەزدە قارىز السا، بايدەننىڭ باسقارۋىنداعى بيلىك ەڭ جوعارى ينفلياتسيا مەن پايىزدىق مولشەرلەمە كۇرت كوتەرىلگەن كەزدە دە قارىز الىپ جاتىر. فەدەرالدى رەزەرۆ جۇيەسى باعانى تەجەۋ ءۇشىن پايىزدىق مولشەرلەمەنى كوتەرگەن سايىن قارىزدىڭ دا قامىتى قىسا تۇسەدى.
الماقتىڭ دا سالماعى بار. وسىلايشا ينفلياتسيا ا ق ش تاريحىندا قىرىق جىلدا بولماعان دەڭگەيگە جەتتى.
- بۇرىن قىزىم ەكەۋىمىز اپتاسىنا ازىق-تۇلىككە 135 دوللار جۇمساساق، قازىر 200 دوللار شىعارامىز. كەيبىر زاتتاردى المايتىن بولدىق.
- ازىق-تۇلىكتىڭ باعاسى قىمباتتاپ جاتىر. ەڭ قاجەت دەگەن جۇمىرتقا، ءسۇت باعاسىنان-اق بايقاۋعا بولادى. شامادان تىس قارىز ينفيلياتسيا قىسىمىن ارتتىرىپ، ۇلتتىق قارىزدى 2030-جىلعا قاراي جاڭا رەكوردقا جەتكىزەدى. ال كەلەسى ون جىلدىقتا پايىزدىق مولشەرلەمە بۇدان دا جىلدام وسەدى، دەپ جازادى فەدەرالدى بيۋجەتكە جاۋاپتى كوميتەت رەسمي سايتىندا.
قىسقا مەرزىمدە ينفلياتسيا ۇلكەن الاڭداۋشىلىق تۋعىزادى. ءبىراق مەملەكەتتىك قارىزداردىڭ شەكتەن تىس كوبەيىپ كەتۋى كەلەشەكتە «وتە ۇلكەن پروبلەماعا» الىپ كەلۋى مۇمكىن، - دەيدى ساراپشىلار.
ا ق ش- تىڭ ۇلتتىق قارىزى سوڭعى ونجىلدىقتا كۇرت وسكەن. قازىناشىلىق دەپارتامەنتىنىڭ مالىمەتى بويىنشا 2009-جىلى باراك وباما پرەزيدەنت بولىپ كەلگەندە، مەملەكەتتىك قارىز 10,6 تريلليون دوللاردى قۇراسا، 2017-جىلى دونالد ترامپتىڭ تۇسىندا 19,9 تريلليونعا جەتتى. ال دجو بايدەن قىزمەتكە كىرىسكەن 2021-جىلدىڭ قاڭتارىندا 27,8 تريلليون دوللار بولعان.
كامران بوحاري، «Newline institute « ساراپتامالىق دامۋ ينستيتۋتىنىڭ ديرەكتورى:
- ا ق ش ەكونوميكاسىنا بۇل قارىزدار ۇلكەن سالماق سالادى. قارىز نەعۇرلىم كوپ بولعان سايىن ول قارجىلىق جۇيەگە دە كەرى اسەرىن تيگىزەدى. دەگەنمەن ا ق ش الەمنىڭ ءبىرىنشى ەكونوميكاسى سانالاتىن سۋپەردەرجاۆا جانە حالىقارالىق ساۋدا-ساتتىق نەگىزىنەن دوللارمەن جۇرەدى. سوندىقتان امەريكا دامۋشى مەملەكەت بولسا بۇنداي قارىزبەن ءسوزسىز قينالىپ قالاتىن ەدى.
نۇربەك بەكەن، ءتىلشى:
- ۇلتتىق قارىز كوبەيىپ، قىمباتشىلىقتىڭ جايلاۋى ەل بيلىگىندەگى دەموكراتتارعا وڭاي سوقپاسى انىق. ويتكەنى قاراشانىڭ باسىندا وتەتىن كونگرەسس سايلاۋىندا حالىقتىڭ بۇيرەگى كىمگە بۇرىلاتىنى بەلگىسىز.
