بيىل استانادا پروبلەمالى 30 ءۇيدىڭ قۇرىلىسى اياقتالماق
«قۇرىلىسى ۇزاققا سوزىلعان ءبىرقاتار عيماراتقا باردىم. وزدەرىڭىزگە ءمالىم، ءار نىساننىڭ وتكەن تاريحى ءارتۇرلى، ولاردىڭ قۇرىلىسى بىرنەشە جىلدان بەرى بىتپەي كەلەدى. ماسەلەن «اقەركە-2» تۇرعىن ءۇي كەشەنىنىڭ، ءتىپتى ىرگەتاسى دا بولماعان ەدى، ال «پانا» تۇرعىن ءۇي كەشەنىنىڭ قۇرىلىسى 8 جىل بۇرىن باستالعان.
وسىعان دەيىن اكىمدىك قۇرىلىسى ۇزاققا سوزىلعان نىسانداردى اياقتاۋ بويىنشا ۇلكەن جۇيەلى جۇمىس جۇرگىزگەن بولاتىن. دەگەنمەن قالعان نىسانداردى اياقتاۋ مىندەتى دە موينىمىزدا تۇر. بۇل – 30 دان استام تۇرعىن ءۇي كەشەنى. وندا مىڭداعان وتباسى جىلدار بويى باسپاناسىن كۇتىپ ءجۇر. قۇرىلىسى ۇزاققا سوزىلعان ءاربىر نىساندى اياقتاۋ بويىنشا وزىندىك جوسپار بار. بيىل وسى نىسانداردى اياقتاۋدى تاپسىردىم»، - دەپ جازدى ج. قاسىمبەك Instagram-دا.
سونداي-اق استانا باسشىسى قالانى ارالاۋ بارىسىندا دونور-نىسانداردىڭ قۇرىلىسىمەن تانىستى. ولار ۇزاققا سوزىلعان نىسانداردىڭ قۇرىلىسىن اياقتاۋ ءۇشىن سالىنعان قاراجاتتىڭ قايتارىمدىلىعىن قامتاماسىز ەتەدى. قۇرىلىسى ۇزاققا سوزىلعان نىسانداردىڭ اياقتالۋى مەملەكەت باسشىسىنىڭ دا باقىلاۋىندا.
