الماتىدا كوكتايعاقتىڭ كەسىرىنەن 30-عا جۋىق جول اپاتى بولدى: پوليتسيا ەسكەرتۋ جاسادى

«تاڭعى ساعات التىدان بەرى مەگاپوليستىڭ جوعارعى بولىگىندە 25-تەن استام جول- كولىك وقيعاسى بولدى. ونىڭ 10-دا زارداپ شەككەندەر بار. جاۋىن- شاشىن مەن كوكتايعاق قالاداعى كولىك قوزعالىسىن ايتارلىقتاي قيىنداتاتىنى انىق. كەپتەلىس پايدا بولىپ، كولىكتەردىڭ وتكىزۋ قابىلەتى ناشارلادى»، - دەيدى الماتى قالالىق پوليتسيا دەپارتامەنتى جەرگىلىكتى پوليتسيا قىزمەتىنىڭ باستىعى، پوليتسيا پولكوۆنيگى ماناپ ساتتاروۆ.

سونداي-اق ونىڭ ايتۋىنشا، جول كولىك وقيعالارى كوبىنە جول قوزعالىسىنا قاتىسۋشىلاردىڭ ءتارتىپ ساقتاماۋىنان بولادى.

«كەي جۇرگىزۋشىلەر جىلدامدىقتى باسەڭدەتپەيدى، توتەنشە جاعداي تۋعىزادى، قاۋىپتى مانەۆر جاسايدى، ءبىر-ءبىرىن سىيلامايدى، جاياۋ جۇرگىنشىلەر جولدى رۇقسات ەتىلمەگەن جەردەن كەسىپ وتەدى. وسى فاكتورلار جول قوزعالىسىنا جالپى كەرى اسەر ەتىپ وتىر»، - دەدى ماناپ ساتتاروۆ.

سول سەبەپتى الماتى پوليتسەيلەرى جولدىڭ قاتەلىكتى كەشىرمەيتىنىن ەسكە سالدى. «جول قوزعالىسى ەرەجەلەرىن ساقتاۋ - ءسىزدىڭ جانە جاقىندارىڭىزدىڭ ءومىرىنىڭ قاۋىپسىزدىگىنىڭ كەپىلى»، - دەدى پوليتسيا.

اۆتور: دۋمان ارعىنگەلدى

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى