سەمەيدە 30 جىل بويى جەكە كۋالىكسىز جۇرگەن ادام انىقتالدى
ش ق و پوليتسيا دەپارتامەنتى باسپا ءسوز قىزمەتىنىڭ مالىمەتىنە سۇيەنسەك، ءتارتىپ ساقشىلارى جەكە باستى كۋالاندىراتىن قۇجاتسىز تۇراتىن ازاماتتاردى انىقتاۋ ءۇشىن تۇراقتى جۇمىس جۇرگىزۋدە. وسى جىلدىڭ باسىنان بەرى وسىنداي 200 دەن استام ادام انىقتالعان. قازىرگى ۋاقىتتا ولار قازاقستان رەسپۋبليكاسىنىڭ ازاماتتارى دەپ تانىلىپ، جەكە كۋالىكتەرىن راسىمدەدى.
«ماسەلەن، سەمەي قالاسى پ ب كوشى-قون قىزمەتى ءبولىمىنىڭ وكىلدەرى 1974 -جىلعى ۇلگىدەگى ك س ر و پاسپورتىمەن جۇرگەن 54 جاستاعى ەر ادامعا جەكە كۋالىك الۋعا كومەكتەستى. نوۆوسىبىر وبلىسىنىڭ تۋماسى 1989 -جىلى سەمەيگە كوشىپ كەلگەن. وسىندا ۇيلەنىپ، ەكى بالاسى دۇنيەگە كەلگەن ول ءالى كۇنگە دەيىن قىزىل پاسپورتىن جەكە كۋالىككە ايىرباستاماعان. ءسويتىپ، ەر ادام 30 جىلدان استام ۋاقىت بويى تۇراقتى جۇمىسقا ورنالاسا المادى»، - دەلىنگەن اقپاراتتا.
كوشى-قون قىزمەتىنىڭ ماماندارى وعان رەسەي فەدەراتسياسىنان قاجەتتى قۇجاتتاردى سۇراتۋعا كومەك كورسەتتى. قازىرگى ۋاقىتتا ازامات كوپتەن كۇتكەن قۇجاتىن قولىنا الدى. ەندى رەسمي تۇردە جۇمىسقا ورنالاسىپ، بارلىق مەملەكەتتىك قىزمەتتەردى پايدالانا الادى.
اۆتور: تالعاتجان مۇحامەتبەك ۇلى
