ەلوردادا تاۋەلسىزدىكتىڭ 30 جىلدىعىنا وراي قىسقى جۇگىرۋ جارىسى ءوتتى - ۆيدەو
«Qysqy jugiru» جارىسىنىڭ نەگىزگى قاشىقتىعى 10 شاقىرىمدى قۇرادى. جارىسقا 250-گە جۋىق قالا تۇرعىنى مەن قوناقتارى جانە سپورت اۋەسقويلارى قاتىستى. ءىس-شاراعا ق ر مادەنيەت جانە سپورت ۆيتسە-ءمينيسترى سەرىك جاراسبايەۆ، م س م سپورت جانە دەنە شىنىقتىرۋ ىستەرى كوميتەتىنىڭ ءتوراعاسى سامات ەرعاليەۆ، نۇر-سۇلتان قالاسىنىڭ ترياتلون فەدەراتسياسىنىڭ پرەزيدەنتى ەرجان ءبىرجانوۆ جانە نۇر-سۇلتان قالاسىنىڭ دەنە شىنىقتىرۋ جانە سپورت باسقارماسىنىڭ باسشىسى سامات جىلقىبايەۆ قاتىسىپ، بەرىلگەن ون شاقىرىمدى جارىس قاتىسۋشىلارىمەن بىرگە باعىندىردى.
«قايىرلى تاڭ، قۇرمەتتى جارىس قاتىسۋشىلارى! ەل تاۋەلسىزدىگىنىڭ 30 جىلدىعىنا ارنالعان قىسقى جۇگىرۋ جارىسىنا قوش كەلدىڭىزدەر. ەلوردالىق تۇرعىندار بۇقارالىق سپورتتى دامىتۋعا ەرەكشە كوڭىل بولەدى. سونىڭ دالەلى بۇگىن مىنە، قالا تۇرعىندارى جانە اۋەسقوي سپورتشىلار ترياتلون ساياباعىندا ءوتىپ جاتقان قىسقى جۇگىرۋگە قاتىسۋدا. بارشاڭىزعا ساتتىلىك، جەڭىس تۇعىرىنان كورىنۋلەرىڭىزدى تىلەيمىن. الداعى كەلە جاتقان مەرەكەلەر قۇتتى بولسىن!»، - دەدى ق ر مادەنيەت جانە سپورت ۆيتسە-ءمينيسترى سەرىك جاراسبايەۆ.
«Qysqy jugiru» جارىسىنىڭ قاتىسۋشىلارى 5 جاس ەرەكشەلىكتەرى بويىنشا سىنعا ءتۇستى. اتاپ ايتاق: 18-29 جاس؛ 30-39 جاس؛ 40-49 جاس؛ 50-59 جاس؛ 60 جاس جانە ودان جوعارى. «بۇگىن اۋەسقوي سپورتشىلاردىڭ باسىن بىرىكتىرىپ، جاڭا جىلدىڭ الدىندا جۇگىرۋ وتكىزدىك. قاتىسۋشىلاردىڭ سانى 250-گە جۋىق. قاشىقتىق- 10 ك م. ماقساتى - قالا تۇرعىندارىن سپورتقا باۋلۋ. قازىرگىدەي قيىن كەزدە سپورتپەن اينالىسقان ادامدار از اۋىرادى. سوندىقتان، بارلىقتارىڭىزدى سپورتپەن شۇعىلدانۋعا شاقىرامىز»، - دەدى قالالىق ترياتلون فەدەراتسياسىنىڭ پرەزيدەنتى ەرجان ءبىرجانوۆ.
جارىستىڭ باستى ماقساتى - ەلوردادا بۇقارالىق سپورتتى دامىتۋ، نۇر-سۇلتان تۇرعىندارى مەن قوناقتارى اراسىندا سالاۋاتتى ءومىر سالتىن ناسيحاتتاۋ، ۇلت دەنساۋلىعىن جاقسارتۋ.
«بۇگىن جارىس تاماشا ءوتتى دەپ ايتۋعا بولادى. اۋا رايىنا بايلانىستى كىشكەنە مۇز بولدى، سوعان قاراماستان جارىستىڭ ۇيىمداستىرىلعانىنا ۇلكەن راقمەت ايتام. جارىس تاماشا بولدى»، - دەدى قاتىسۋشى اقاس قالدىبەك.
مارەگە جەتكەن ءاربىر قاتىسۋشىعا فينيشورلىق مەدالى تابىستالىپ، ءار جاس ساناتتاعى جەڭىمپازدار سەرتيفيكاتتارمەن جانە باعالى سىيلىقتارمەن ماراپاتتالدى.
ايتا كەتەيىك، جارىس بارلىق سانيتارلىق نورمالار مەن كارانتين تالاپتارىن ساقتاي وتىرىپ ءوتتى.
