قاراعاندىعا س ۋ-30 س م جويعىش ۇشاقتارى جەتكىزىلدى

يركۋتسك قالاسىندا جاسالعان اۋە تەحنيكاسىنىڭ ەرەكشەلىگى نەدە؟

كوپ بەيىندى س ۋ-30 س م ۇشاقتارى رەسەيمەن جاسالعان كەلىسىم جانە قازاقستاننىڭ قارۋلى كۇشتەرىن قايتا جاراقتاۋ باعدارلاماسى اياسىندا الىنىپ وتىر. ونى قاراعاندىعا يركۋتسك زاۋىتىنىڭ تاجىريبەلى ۇشقىشتارى جەتكىزدى. قارسى الۋ راسىمىنە قورعانىس ءمينيسترى نۇرلان ەرمەكبايەۆ قاتىستى. جاڭا بۋىندى جويعىش ۇشاق «س ۋ-27» مەن «م ي گ-31» سەكىلدى ەكى بىردەي اسكەري اۋە تەحنيكاسىن الماستىرا الادى ەكەن.

جاندوس وڭلاس، ۇشقىش- شتۋرمان:

- ەكى كابينادا دا بارلىعى جاڭارتىلعان. قازىرگى زامانعا لايىقتى قىلىپ جاسالعان. ءوزىنىڭ مانيەۆرلىگىمەن ول اۋەدە دە، جەردە دە جۇمىس ىستەيدى جانە سۋدىڭ بەتىندەگى قارسىلاستارىمەن دە جاقسى جۇمىس ىستەيتىن ۇشاقتاردىڭ ءبىرى. بارلىعىمىز دا قۋانىپ جاتىرمىز، ءبىزدىڭ 610-اۆيابازامىزعا وسى زامانعا لايىق ۇشاقتاردىڭ كەلىپ جاتقانىنا.

س ۋ-30 س م ۇشاعى كەز كەلگەن اۋا رايىندا، كۇندىز دە، تۇندە دە ەركىن قالىقتايدى. تەك اۋەدەگى عانا ەمەس، جەرۇستى نىسانالارىن دا جويىپ جىبەرۋگە، بارلاۋ جۇرگىزۋگە جانە وزگە سەرىكتەرىنە نىسانا كورسەتۋگە قابىلەتتى. شۇعىل جاعدايدا ۇشاققا وتىندى اۋەدە دە قۇيۋعا بولادى ەكەن. وتە جىلدام اسكەري ۇشاقتاردىڭ اۋەدەگى ءار باعىتى سەكۋندتارمەن ولشەنەدى. سوندىقتان ۇشقىشتاردىڭ ۇقىپتىلىعى ءبىرىنشى كەزەكتە ەكەن.

تەمىرلان بايمەنوۆ، اۆياتسيالىق زۆەنونىڭ اعا ۇشقىشى:

- قازىرگى تاڭدا بۇل الەمدەگى ەڭ ۇزدىك جويعىش ۇشاق بولىپ تابىلادى. ونىمەن ۇشۋ ءۇشىن ءبىز جارتى جىل وقىپ، دايىندالدىق. قازىر ءبىزدىڭ قاراعاندىداعى اۆياتسيالىق بازا تۇگەلدەي تالدىقورعاندا بىلىكتىلىكتەرىن جەتىلدىرىپ جاتىر. العاشقى توپ وقۋدى اياقتاپ، مىنە جەتتىك. اسكەري كەزەكشىلىككە شىعۋعا دايىنبىز.

مۇزداي قارۋلانعان بۇل ۇشاق 40 شاقىرىم بيىكتىكتە 250 شاقىرىم قاشىقتىقتاعى كەز كەلگەن قارسىلاسىن جويىپ جىبەرە الادى. ايتا كەتۋ كەرەك، قازىر ت م د ەلدەرى اراسىندا بۇل ۇشاق تەك رەسەي، بەلارۋس جانە قازاقستاندا عانا بار.

www.24.kz

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى