سولتۇستىك قازاقستاندا 30 شاقتى جۇرگىزۋشى ءومىر بويى كولىك باسقارۋ قۇقىعىنان ايىرىلدى
س ق و پوليتسيا دەپارتامەنتى باسپا ءسوز قىزمەتىنىڭ مالىمەتىنشە، ماس كۇيدە كولىك باسقارعاندارعا سوت كوبىنە باس بوستاندىعىن شەكتەۋگە ۇكىم شىعارادى. ال ماتەريالدىق زالال نەمەسە دەنساۋلىققا جەڭىل زيان كەلتىرگەن جاعدايدا كولىك جۇرگىزۋشىلەر باس بوستاندىعىنان ايىرىلادى. جىل باسىنان وبلىستا ەكى ادامعا وسىنداي قاتاڭ جازا قولدانىلدى.
قىزىلجار اۋدانىنىڭ 29 جاستاعى تۇرعىنى «چەليابى- ءنوۆوسىبىر» تاس جولىندا ءوزىنىڭ «Audi-80» كولىگىمەن «Lada 217030» اۆتوماشيناسىن باسىپ وزامىن دەپ ەكى جىلعا باس بوستاندىعىنان ايىرىلدى. شىلدە ايىندا قىزىلجار اۋدانىنىڭ 37 جاستاعى تاعى ءبىر تۇرعىنى سوتتالدى. ول قوناققا كەلگەن تانىسىمەن ىشىمدىك ىشكەن. كەيىن تانىسىنىڭ «ۆاز 21144» اۆتوكولىگىنە وتىرىپ، اۋدارىپ تاستاعان.
«ىشىمدىك ءىشىپ جولعا شىققاندار ادامداردىڭ ومىرىنە ءقاۋىپ توندىرەدى. بيىل 11 -قاڭتاردان قىلمىستىڭ اتالعان ءتۇرى ءۇشىن جاۋاپكەرشىلىكتىڭ قاتاڭداتىلعانىن اۆتوجۇرگىزۋشىلەرگە تاعى ءبىر رەت ەسكەرتكەندى ءجون دەپ ەسەپتەيمىن. ەندى، نەگىزگى جازادان بولەك، قىلمىسكەرلەر اۆتوكولىك باسقارۋ قۇقىعىنان ءومىر بويىنا ايىرىلادى»، - دەيدى س ق و پ د باستىعىنىڭ ورىنباسارى ەڭبەك سەمبين.
