تۇركىستاندىق دەپۋتاتتار اپات ايماعىنا 30 توننا قاجەتتى زاتتار جونەلتتى

«Nur Otan» پارتياسىنىڭ «ءبىز بىرگەمىز» رەسپۋبليكالىق اكسياسى اياسىندا ماقتاارالدىق تۇرعىندارعا 7 بىردەي جۇك كولىگىنە تيەلگەن ازىق- تۇلىك جولدادى، دەپ حابارلايدى قازاقپارات ءتىلشىسى.

اتالعان قايىرىمدىلىق شاراسىن ۇيىمداستىرۋعا تۇركىستان وبلىستىق ءماسليحاتىنىڭ حاتشىسى قايرات بالابيەۆتىڭ ءوزى ۇيىتقى بولعان. اتالعان كەرۋەندى شىعارىپ سالۋ شاراسىنا وبلىس اكىمى ءومىرزاق شوكەيەۆ ارنايى قاتىسىپ، وسىنداي قىسىلتاياڭ ۋاقىتتا ماقتاارالدىقتارعا كومەك قولىن سوزعان ازاماتتارعا العىسىن ءبىلدىردى. ايماق باسشىسى سونداي- اق بۇگىنگى تاڭدا ماقتاارال اۋدانىندا تاسقىن سۋدىڭ بەتىن قايتارۋ بويىنشا اتقارىلىپ جاتقان جۇمىستار بارىسىن باياندادى.

«اپات ايتىپ كەلمەيدى. ماقتاارال اۋدانىندا ءدال قازىرگى ۋاقىتتا قاۋىپتىڭ بەتى قايتا باستادى. اتالعان اۋداندا مىڭعا جۋىق مامان جۇمىس ىستەپ جاتىر. 3,5 مىڭنان استام تۇرعىن ەۆاكۋاتسيا ورىندارىنا جايعاستىرىلعان. ولارعا ءبىز بارلىق ءتيىستى كومەكتەردى كورسەتۋىمىز قاجەت. وسى رەتتە ەلدىڭ سونىڭ ىشىندە دەپۋتاتتاردىڭ وسىنداي باستاما كوتەرىپ، حالىققا بولىسۋى كوڭىل قۋانتادى. ەڭ باستىسى - حالىققا سابىر مەن توزىمدىلىك قاجەت. الداعى ۋاقىتتا تاسقىن سۋدان كەلگەن شىعىندار تولىق ەسەپتەلىپ، جاڭا ۇيلەر بوي كوتەرىپ، جولدار جوندەلىپ قالىپتى ءومىر باستالاتىنىنا سەنىمدىمىز»، -دەدى ءومىرزاق شوكەيەۆ.

ايتا كەتەيىك، جالپى سومماسى 21 ميلليون تەڭگە بولاتىن كەرۋەنىندە ازىق- تۇلىك تاۋارلارىنان بولەك، كيىم- كەشەك، جەكە باس گيگيەناسىنا ارنالعان تاۋارلار بار. ياعني، كەرۋەندە 11,7 توننا ۇن، 2,9 توننا كۇرىش، 3,6 توننا قانت، 2,8 توننا ماكارون، 1,5 توننا ەت، 900 كەلى جۋىق ءسۇت ونىمدەرى، 2,8 توننا كارتوپ، 1,7 توننا پياز، 1,3 توننا ءسابىز جانە تاعى باسقا دا ازىق- تۇلىك ونىمدەرى تيەلگەن. اتالعان كەرۋەن ءتۇس اۋا ماقتاارال اۋدانى اتاكەنت كەنتىندە ورنالاسقان ارنايى قويماعا كەلىپ جەتەدى دەپ كۇتىلۋدە.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى