كەمەڭگەرلىكتىڭ 30 جىلىنداعى ءبىر جەتىستىك - شۇعىلالى نۇر-سۇلتان
ەلباسىنىڭ ەرەن ەڭبەگىنىڭ ءبىرى - شۇعىلالى نۇر-سۇلتان قالاسىن ايتۋعا بولادى. وسىنداي ويىمەن ق ر جوعارعى كەڭەسىنىڭ بۇرىنعى دەپۋتاتى زاۋرە قادىروۆا ءبولىستى، دەپ حابارلايدى قازاقپارات ءتىلشىسى.
زاۋرە قادىروۆا 1990-1995-جىلدارى ق ر الەۋمەتتىك قامسىزداندىرۋ جانە الەۋمەتتىك قورعاۋ ءمينيسترى، پارلامەنت ءماجىلىسىنىڭ بىرنەشە شاقىرىلىم دەپۋتاتى بولعان. ول قازاقستان العاش تاۋەلسىزدىك العان قيىن-قىستاۋ زاماننان باستاپ تۇڭعىش پرەزيدەنتپەن بىرگە ەل احۋالىن جاقسارتۋ ساپىندا قىزمەت ەتكەنىن دە ماقتان تۇتادى.
«البەتتە 30 جىل ادامزات ءۇشىن تاريحتىڭ ءبىر ءساتى سياقتى. ءبىراق قازاقستان ءۇشىن 30 جىل ۇلكەن وزگەرىس اكەلدى. مەن وسى ۋاقىتقا دەيىن كوپ وڭ وزگەرىستەردىڭ كۋاسى بولىپ كەلەمىن. ەڭ باستى نۇرسۇلتان نازاربايەۆتىڭ تاۋەلسىز قازاقستاندى قۇرۋداعى ەڭبەگىن ايتسام بولادى. مەن تاۋەلسىز قازاقستاننىڭ ءبىرىنشى الەۋمەتتىك قورعاۋ ءمينيسترى بولدىم. سول جىلدارى حالىقتىڭ احۋالى وتە قيىن ەدى. زەينەتكەرلەرگە زەينەتاقىنىڭ ءوزى ۇلكەن قيىندىقپەن بەرىلەتىن. قازىر 30 جىلدان سوڭ، ونداي جاعداي بولماعانداي، اللاعا شۇكىر حالىقتىڭ جاعدايى جاقسى. ەكىنشىدەن، جاي عانا باياعى ەسكى تىڭ يگەرۋشىلەر قالاشىعى بولعان سەلينوگرادتىڭ الەمگە ايگىلى استاناعا اينالۋىنىڭ ءوزىن ايتساڭىزشى. بۇل ترانسفورماتسيانى بۇكىل الەم باقىلادى. بۇرىنعى سەلينوگراد قالاسى جاي عانا ورتانقول قالانىڭ ءبىرى بولاتىن. تاۋەلسىزدىك جىلدارىندا ءتىپتى قۇلدىراپ كەتىپ ەدى. قازىر ول ەۋرازيا جۇرەگىنە اينالدى. بۇگىنگى كەزدەسۋدە ق ر تۇڭعىش پرەزيدەنتىنىڭ قازاقستاننىڭ دامۋىنا قوسقان 30 جىل ەڭبەگى ايتىلدى. مەنىڭ ويىمشا، بۇل تاقىرىپ ءالى تالاي كىتاپقا عانا ەمەس عىلىمي زەرتتەۋلەرگە دە ازىق بولارى انىق»، - دەدى قادىروۆا زاۋرە.
