قازاقستاندا اجىراسقان اكەلەردىڭ 30 پايىزى بالالارىمەن تىلدەسە المايدى
بۇل تۋرالى استانادا وتكەن «بالا اۋماعى - باقىت اۋماعى» وتىرىسىندا ايتىلدى.
«سوت شەشىمىنە قاراماستان، اكەلەردىڭ %30 بالالارمەن قارىم-قاتىناس جاساۋ مۇمكىندىگىنەن ايىرىلعان. ولار سوتقا قايتا جۇگىنۋگە ءماجبۇر. بۇل ماسەلەدە يۋۆەنالدىق سوتتار كامەلەتكە تولماعان بالالاردىڭ قۇقىعى مەن بوستاندىعىن قورعاۋدى ەسكەرە وتىرىپ، پسيحولوگتاردىڭ قاتىسۋىمەن شەشىم قابىلدايدى»، - دەدى «قازاقستان ايەلدەرى قاۋىمداستىعى» قوعامدىق بىرلەستىگىنىڭ پرەزيدەنتى گۇلنار بايىمبەتوۆا.
«كەلەشەك» پسيحولوگيالىق ورتالىعىنىڭ ديرەكتورى ناتاليا سەمەنەنكو پسيحولوگتارعا ارنالعان ارنايى ەرەجە قاجەتتىگىن جەتكىزدى.
«كامەلەت جاسىنا تولماعانداردىڭ ءىسى بويىنشا بىرنەشە جىل سۋديا بولىپ جۇمىس ىستەدىم. ءبىر تۇسىنگەنىم، قازاقستاندا پسيحولوگتاردىڭ نورماتيۆتى قۇجاتى جوق. سوندىقتان، اجىراسۋ مەن بالالاردى بولىسۋدە پسيحولوگ كومەگى ءتيىمسىز بولىپ وتىر. سەبەبى، ءار پسيحولوگ ءوز تاجىريبەسى مەن ءوز پايىمىنا قاراي جۇمىس ىستەيدى. قوس تاراپقا بىردەي قاراماي، كونسۋلتاتسياعا جازىلعان تاراپتى قولداپ كەتۋى دە ىقتيمال»، - دەدى «كەلەشەك» پسيحولوگيالىق ورتالىعىنىڭ ديرەكتورى ناتاليا سەمەنەنكو.
ونىڭ ايتۋىنشا، ءىستى قاراۋ پروتسەدۋراسىن رەتتەيتىن نورماتيۆتى قۇجات بولۋى ءتيىس. قۇجاتتا بالانىڭ پسيحولوگپەن كەزدەسۋ سانىن، پسيحولوگيالىق تەستىلەۋدەن ءوتۋىن انىقتايتىن نورمالار بولۋى قاجەت.
«پسيحولوگيالىق تەستىلەۋدى جاتتاپ العان بالالاردى دا كوردىك. ياعني اتا-انا اجىراسىپ، ودان كەيىنگى ماسەلەلەردى شەشۋگە تىرىسىپ جاتىر. ال بالالار ەرلى-زايىپتىلاردىڭ كۇش پەن بيلىكتى يەمدەنۋىنە كومەكتەسەتىن قۇرالعا اينالدى. بالالاردىڭ مىندەتى - دامۋ جانە وقۋ. بىرگە تۇرسا دا، بولەك تۇرسا دا، بالالار تەك باقىتتى اتا-انانى كورۋى كەرەك. بالالار قورعاۋعا مۇقتاج، ال پسيحولوگتارعا قۇرال جەتىسپەيدى. ءبىز بارلىق وڭىردە ءبىرىڭعاي ەرەجەنىڭ جۇمىس ىستەگەنىن قالايمىز»، - دەدى ن. سەمەنەنكو.
وتىرىستا «قازاقستان ايەلدەرى قاۋىمداستىعى» قوعامدىق بىرلەستىگى اجىراسۋ كەزىندە بالالار مەن اتا- انالارعا الەۋمەتتىك-پسيحولوگيالىق، پسيحولوگيالىق-پەداگوگيكالىق زەرتتەۋلەر وتكىزۋ جونىندەگى ەرەجەنى ۇسىندى. قۇجات كامەلەتكە تولماعان بالالاردىڭ تۇراتىن جەرىن ايقىنداۋ مەن كەزدەسۋ ءتارتىبىن تاعايىنداۋعا سەپتىگىن تيگىزبەك.
ايتا كەتەيىك، قازاقستاندا ەرلى-زايىپتىلاردىڭ اجىراسۋى كوبەيدى. رەسمي دەرەكتەر بويىنشا، قازاقستاندا ءاربىر ەكىنشى نەكە اجىراسۋمەن اياقتالادى، ونىڭ %83 ىنىڭ ورتاق بالالارى بار. 400000 انا بالالارىن جالعىز تاربيەلەپ وتىرسا، 60000 جالعىزباستى اكە بار.
