اۋىل بالالارى شەتەلدە وقۋعا 30 گرانت ۇتىپ الدى
اۋىلدى جەردە ونداي بالالار كوپ بولىپ شىقتى، دەپ حابارلايدى قازاقپارات ءتىلشىسى.
ايتا كەتكەن ءجون، «IQanat» وليمپياداسى العاش رەت ۇيىمداستىرىلىپ وتىر. وعان شىعىس قازاقستان وبلىسىنىڭ التى اۋدانى - كۇرشىم، زايسان، كوكپەكتى، تارباعاتاي، ءۇرجار مەن قاتونقاراعايدان ءبىر جارىم مىڭنان استام مەكتەپ وقۋشىسى قاتىستى. ال بارلىق شىعىندار مەتسەناتتاردىڭ ەسەبىنەن وتەلدى.
«بۇل باعدارلاما وتكەن جىلى قىركۇيەك ايىندا باستالعان بولاتىن. ءبىز شىعىس قازاقستان وبلىسىنىڭ شالعاي جاتقان اۋداندارىن تاڭدادىق. شەكاراعا جاقىن جاتقان اۋىلداردىڭ بالالارىن قامتۋعا تىرىستىق. ءسويتىپ، پيلوتتىق نەگىزدە العاشقى وليمپيادانى وتكىزدىك. جىل بويى ءار توقسان سايىن اۋدان ورتالىقتارىندا وليمپيادالار ۇيىمداستىرىلدى. سونىڭ ناتيجەسى بويىنشا بالالار ۇپاي جينادى. ءبىزدىڭ ماماندارىمىز وزدەرى بارىپ، سىناقتاردى وتكىزىپ وتىردى. ال بالالاردىڭ بارلىق جۇمىستارى استانادا تەكسەرىلدى. وسىلايشا، ءتورت كەزەڭنەن سۇرىنبەي وتكەن 177 بالا قورىتىندى وليمپياداعا كەلدى. ولار ماتەماتيكا، فيزيكا، اعىلشىن ءتىلى، ەسسە جازۋ جانە ۇزاق قاشىقتىققا جۇگىرۋدەن سىنعا ءتۇستى. بۇگىن 30 جەڭىمپازدى ماراپاتتاپ وتىرمىز»، - دەيدى بيزنەسمەن ايدىن راحىمبايەۆ.
جەڭىمپازداردىڭ بارلىعى ەكى توپ - 9- جانە 10- سىنىپتار بويىنشا انىقتالدى. وسىلايشا، 9- سىنىپتار اراسىندا اعىلشىن تىلىنەن - دارىن دالەلوۆ (زايسان، ح. مۇستافينا اتىنداعى ورتا مەكتەپ) ، ساۋلە ەرجانوۆا (كوكپەكتى، ج. بولعانبايەۆ اتىنداعى سامار ورتا مەكتەپ- ليتسەيى) جانە دايانا تۇراربەكوۆا (قاتونقاراعاي، ۇلكەن نارىن اۋىلدىق ليتسەيى) ، ماتەماتيكادان - مەرەيىم قۋاندىقوۆا (كوكپەكتى، ج. بولعانبايەۆ اتىنداعى سامار ورتا مەكتەپ- ليتسەيى) ، قۇمار تاسقىن (كۇرشىم، سارىولەڭ ورتا مەكتەبى) جانە ارايلىم ماكەنوۆا (زايسان، م. داۋلەنوۆ اتىنداعى مەكتەپ- ينتەرنات) ، فيزيكادان - ماليكا ۆاحاسوۆا (كوكپەكتى، وكتيابر مەكتەپ- بالاباقشا كەشەنى) ، ءمادي داۋلەتحان (كوكپەكتى، ج. بولعانبايەۆ اتىنداعى سامار ورتا مەكتەپ- ليتسەيى) جانە نارگيز احمەتوۆا (كوكپەكتى، ج. بولعانبايەۆ اتىنداعى سامار ورتا مەكتەپ- ليتسەيى) ، ەسسە جازۋدان - انار قادىرحانوۆا (تارباعاتاي، قابدەن اقىنوۆ اتىنداعى ورتا مەكتەپ) ، جۇلدىز قادىربەردى (قاتونقاراعاي، رىكوۆ اتىنداعى ورتا مەكتەپ) جانە اقەركە قاليبەكوۆا (كوكپەكتى، كوكجوتا ورتا مەكتەبى) وق بويى وزىق شىقتى.
سول سياقتى 10- سىنىپ وقۋشىلارى اراسىندا اعىلشىن تىلىنەن - قالامقاس سەيىتباقوۆا (زايسان، ح. مۇستافينا اتىنداعى ورتا مەكتەپ) ، مادينا قايرات قىزى (ءۇرجار، ابىلايحان اتىنداعى مەكتەپ- بالاباقشا) جانە انەل قاسىمحانوۆا (كوكپەكتى، سامار ورتا مەكتەبى) ، ماتەماتيكادان - ارايلىم تالعات قىزى (قاتونقاراعاي، اقسۋ ورتا مەكتەبى) ، ساتيما ۆالسونى (زايسان، ح. مۇستافينا اتىنداعى ورتا مەكتەپ) جانە جانەل عاريفۋللينا (زايسان، ح. مۇستافينا اتىنداعى ورتا مەكتەپ) ، فيزيكادان - الينا اسىلحانوۆا (تارباعاتاي، ت. رىسقۇلوۆ اتىنداعى ورتا مەكتەپ) ، اقەركە قابىلبەك (زايسان، سارىتەرەك ورتا مەكتەبى) جانە شاكارىم جەكسەنبى ۇلى (زايسان، ح. مۇستافينا اتىنداعى ورتا مەكتەپ) ، سونداي- اق، ەسسە جازۋدان دانا زەينوللينوۆا (كوكپەكتى، ج. بولعانبايەۆ اتىنداعى سامار ورتا مەكتەپ- ليتسەيى) ، كارينا دوسانوۆا (كوكپەكتى، مارينوگوركا ورتا مەكتەبى) جانە نازىم مۇقىشيەۆا (كوكپەكتى، مارينوگوركا ورتا مەكتەبى) جەڭىمپاز اتاندى. ال جۇگىرۋدەن بەرىك ساعىندىق (زايسان، م. اۋەزوۆ اتىنداعى ورتا مەكتەپ) ، تەمىرلان زيادا ء(ۇرجار، قارابۇلاق ورتا مەكتەبى) ، شىڭعىس ماماشيەۆ (كۇرشىم، بۋراباي ورتا مەكتەبى) ، جانسۇلۋ جەكسەنبايەۆا (كوكپەكتى، م. اۋەزوۆ اتىنداعى ورتا مەكتەپ) ، ءمولدىر سايلاۋبەكوۆا (قاتونقاراعاي، ق. داميتوۆ اتىنداعى ورتا مەكتەپ) جانە زەينەپ امانتايەۆا (ءۇرجار، ب. ساحاريەۆ اتىنداعى باقتى ورتا مەكتەبى) جەڭىس تۇعىرىنان كورىندى.
بارلىعىنا رەسەي، قىتاي مەن لاتۆيا ۋنيۆەرسيتەتتەرىندە ءبىلىم الۋعا گرانتتار تابىستالدى. بۇدان بولەك، ءاربىر ءۇش جەڭىمپازدىڭ ىشىنەن ۇزدىك شىققان ءبىر بالانىڭ مەكتەبىنە 2 ميلليون تەڭگەنىڭ قۇرال- جابدىقتارى تابىستالدى. ول - تسيفرلىق پروتوتيپ جاساۋ زەرتحاناسى. وليمپيادانىڭ تاعى ەكى قاتىسۋشىسى - ديلناز كەگىمبايەۆا (كۇرشىم، سارىولەڭ ورتا مەكتەبى) مەن جانسايا ماقسۇتوۆاعا (قاتونقاراعاي، رىكوۆ اتىنداعى ورتا مەكتەپ) قازاق مەملەكەتتىك زاڭ ۋنيۆەرسيتەتىنىڭ گرانتتارى تابىستالدى.
بارلىق وقۋشىلاردىڭ ىشىنەن ماليكا ۆاحاسوۆانى ەرەكشە اتاپ وتكەن ءجون. ول باسقالارمەن بىرگە شەتەلدە وقۋعا گرانتتى ۇتىپ، ءوز مەكتەبىنە ارنايى اپپاراتۋرانى الىپ بەردى. بۇدان بولەك، الماتىداعى رەسپۋبليكالىق فيزيكا- ماتەماتيكا مەكتەبىنە قابىلداندى. وعان قوسا، مەتسەنات ايدىن راحىمبايەۆتىڭ ارنايى گرانتىنا يە بولدى. ەندى، ماليكا قىتاي، رەسەي مەن ليتۆا ۋنيۆەرسيتەتتەرىمەن شەكتەلمەي، الەمنىڭ كەز كەلگەن جوعارى وقۋ ورنىن تەحنيكالىق ماماندىق بويىنشا تاڭداي الادى. ونىڭ وقۋعا كەتكەن بارلىق شىعىندارى تولەنەدى.
«جارىستار بىلتىر باستالدى. العاشقى ءۇش تۋردا تەست تاپسىرمالارى بولدى. ال ءتورتىنشى تۋردا التى ەسەپتى شەشتىم. سول بويىنشا ورىن الدىم. جەڭىمپاز بولعانىما وتە قۋانىشتىمىن»، - دەدى م. ۆاحاسوۆا قازاقپارات تىلشىسىنە بەرگەن سۇحباتىندا.
ال ءۇش ەلدە تەگىن ءبىلىم الۋعا گرانت ۇتىپ العان بالالار 11-سىنىپتى اياقتاعان سوڭ، ءوز قالاۋىمەن بەس ۋنيۆەرسيتەتتىڭ بىرەۋىن تاڭداي الادى. «IQanat» قورى سول ۋنيۆەرسيتەتتەرگە تۇسۋگە كومەكتەسەدى. بەيجىڭ ۋنيۆەرسيتەتى، ۆيتاۋتاس پەن كلايپەدا ۋنيۆەرسيتەتتەرى، سونداي- اق، سانكت- پەتەربۋرگتىڭ ەكى ۋنيۆەرسيتەتى - اتالعان قوردىڭ سەرىكتەستەرى. بەسەۋى دە جەڭىمپازدارعا ءوز گرانتتارىن بەرىپ وتىر. الداعى ۋاقىتتا سەرىكتەس ۋنيۆەرسيتەتتەردىڭ قاتارى كوبەيەدى.
يتا كەتەيىك، وسى جولى "IQanat" وليمپياداسىنا التى اۋدان قاتىسسا، كەلەسى جىلى شىعىس قازاقستان وبلىسى تولىعىمەن قامتىلادى. بۇگىندە قوستاناي، اقمولا، اقتوبە مەن تۇركىستان وبلىستارى قوسىلۋعا دايار. وسىلايشا، وليمپيادانى بارلىق رەسپۋبليكاعا تاراتىپ، اۋىلدا جۇرگەن ءبىلىمدى ءارى دارىندى بالالاردى كوپتەپ انىقتاۋ جوسپارلانعان.
