جىل سوڭىنا دەيىن ستۋدەنتتەرگە ارنالعان 30 وقۋلىق قازاق تىلىنە اۋدارىلادى
«رۋحاني جاڭعىرۋ» باعدارلاماسى جاريالانعالى ۇلتتىق اۋدارما بيۋروسىنا جوعارى وقۋ ورىندارىنان 800-دەن استام كىتاپتىڭ ءتىزىمى كەلىپ ءتۇسىپتى. ەشبىر ۇسىنىس ەسكەرۋسىز قالعان جوق. ال قازاق تىلىنە اۋدارىلۋى ءتيىس وقۋلىقتار ارنايى جۇمىس توبى ازىرلەگەن تالاپتار بويىنشا ىرىكتەلدى.
راۋان كەنجەحان ۇلى، ۇلتتىق اۋدارما بيۋروسىنىڭ جەتەكشىسى:
- بۇل وقۋلىقتار دۇنيە جۇزىندەگى ەڭ ىلگەرى دەگەن وقۋ ورىندارىنىڭ باعدارلاماسىندا بولۋى ءتيىس. ءار وقۋلىق كەمىندە 3 مارتە باسىلىم كورۋى ءتيىس. وزىنە دەگەن سۇرانىستى دالەلدەۋ ءۇشىن. سوڭعى باسىلىمى سوڭعى 3 جىلدىڭ ىشىندە بولسىن، وزەكتىلىگىن راستاۋ ءۇشىن، سودان كەيىن قازىرگى وقۋلىقتار كىتاپ ەمەس، سونىمەن بىرگە قازىرگى تەحنولوگياعا نەگىزدەلگەن ءتۇرلى ينتەراكتيۆتى قۇرالدارمەن جۇرەدى، ولار دا بىرگە ءجۇرسىن دەگەن تالاپتار قويىلدى.
جۇمىس توبىنىڭ تالاپتارىنا ساي كەلىپ، كوميسسيا بەكىتكەن وقۋلىقتىڭ ءبىرى - «الەۋمەتتىك پسيحولوگيا» . بەلگىلى امەريكالىق پسيحولوگ دەۆيد مايەرستىڭ بۇل ەڭبەگىن ەۋرازيا ۇلتتىق ۋنيۆەرسيتەتىنىڭ 8 وقىتۋشى- پروفەسسورى اۋدارعان. بۇل وقۋلىق ا ق ش جانە ەۋروپانىڭ كوپتەگەن جوعارى وقۋ ورىندارىنىڭ باعدارلاماسىندا ءالى دە بار.
گۇلنار شولپانقۇلوۆا، ل. گۋميليەۆ اتىنداعى ە ۇ ۋ دوتسەنتى:
- قازاق حالقىنا بۇل كىتاپ نە بەرەدى دەگەنگە كەلەتىن بولساق، الەۋمەتتىك پسيحولوگيا سالاسىندا، سول ماماندىقتاردا پايدالانۋعا بولادى. ەكىنشىدەن، كەلتىرىلگەن مىسالداردى قازاق ۇلتى ءوزىنىڭ مەنتاليتەتىنە سايكەستەندىرىپ، يكەمدەۋگە بولادى. اعىلشىن تىلىنەن قازاقشاعا «الەۋمەتتىك پسيحولوگيانىڭ» تىڭ دەرەككە تولى 12 باسىلىمى اۋدارىلدى.
پەداگوگيكا عىلىمدارىنىڭ دوكتورى، اۋدارۋشى توپتىڭ جەتەكشىسى قاديشا شالعىنبايەۆانىڭ ايتۋىنشا، بۇل وقۋلىق الەۋمەتتىك پسيحولوگيانىڭ دامۋىنا ۇلكەن ۇلەس قوسادى.
قاديشا شالعىنبايەۆا، ل. گۋميليەۆ اتىنداعى ەۇۋ كافەدرا مەڭگەرۋشىسى، پ. ع. د:
- الەۋمەتتىك پسيحولوگياعا بايلانىستى وقۋلىقتار بىزدە وتە از. بار- جوعى 2-3 وقۋلىق بار. ونىڭ ءوزى شاعىن كولەمدە. امەريكالىق عالىم مايەرستىڭ وقۋلىعىنىڭ كولەمى وتە اۋقىمدى بولىپ وتىر. باسپادان شىققان سوڭ، وقۋلىقتى جاڭا وقۋ جىلىندا ەۋرازيا ۇلتتىق ۋنيۆەرسيتەتىنىڭ باعدارلاماسىنا ەنگىزۋ جوسپاردا بار. ال جىل سوڭىنا دەيىن قازاق تىلىنە تاعى 30 كىتاپ اۋدارىلماق.
www.24.kz
