مۇگەدەك قىزىن 30 جىل باعىپ وتىرعان انا وبلىس اكىمىنەن كومەك سۇرادى - كەسكىن
كەشە وتكەن حالىقپەن كەزدەسۋدە ول وبلىس اكىمىنەن كومەك سۇرادى، دەپ حابارلايدى قازاقپارات ءتىلشىسى.
سانىمگۇل نىسانالينانىڭ قىزى Ⅱ توپ مۇگەدەگى. ول جۇيكە جۇيەسى اۋرۋىنا شالدىققان. بۇگىن انا ارنايى مەكتەپتىڭ قاجەتتىگىن ايتىپ، ءوتىنىش ءبىلدىردى. سەبەبى قىزى مەكتەپ وقىماعان، ۇنەمى جانىندا.
«مۇگەدەك قىزىمنىڭ كۇتىمىمەن ۇيدە وتىرمىن. ءوزىم جۇمىس ىستەمەيمىن. قازىر قىزىمنىڭ زەينەتاقىسىمەن جان باعىپ ءجۇرمىن. ءوتىنىشىم بار. ءوز ەركىمەن ءجۇرىپ-تۇراتىن بالالارعا ارنايى مەكتەپ كەرەك. قىزىم ماعان، مەن قىزىما قاراپ وتىرامىز»، - دەدى سانىمگۇل نىسانالينا.
اقتوبە قالاسىندا مۇگەدەك بالالارعا ارنالعان، اۋتيزم دەرتىنە شالدىققان بالالاردى ەمدەيتىن ورتالىقتار سالىنادى. بيزنەستىڭ الەۋمەتتىك جاۋاپكەرشىلىگى مەن مەملەكەتتىك- جەكەشەلىك سەرىكتەستىك اياسىندا سالىناتىن ورتالىقتار بالالاردىڭ ۋاقىتىن ءتيىمدى وتكىزۋگە ارنالعان.
«مۇمكىندىگى شەكتەۋلى بالالارعا بايلانىستى جۇمىس ءجۇرىپ جاتىر. حرومتاۋداعى مىس كومپانياسىمەن بىرگە مۇگەدەك بالالارعا ارنالعان وڭالتۋ ورتالىعىن سالامىز. الداعى ۋاقىتتا مەملەكەتتىك- جەكەشەلىك سەرىكتەستىكتى ءارى قاراي دامىتىپ، «تۋعان جەرگە تاعزىم» اكسياسىن جالعاستىرامىز. بىزدە كاسىپكەر كوپ. كەيبىرى جاقسى كومەك كورسەتەدى، كەيبىرى ەشتەڭە ىستەمەيدى. ولار كىمنىڭ، نەنىڭ ارقاسىندا كاسىپكەر بولعانىن ۇمىتىپ كەتەدى. بيزنەستىڭ الەۋمەتتىك جاۋاپكەرشىلىگى دەگەن بار. سوندىقتان بارلىق كاسىپكەردى اكسيا اياسىندا جۇمىس ىستەۋگە شاقىرامىن»، - دەدى اقتوبە وبلىسىنىڭ اكىمى بەردىبەك ساپاربايەۆ.
