يبراگيم ەسكەندىر 30 - جەلتوقسان كۇنى كاسىپقوي بوكستاعى ەكىنشى جەكپە- جەگىن وتكىزەدى
بۇل تۋرالى ول قازاقپارات تىلشىسىنە بەرگەن شاعىن سۇحباتىندا ايتىپ ءوتتى.
- يبراگيم، ءسىزدى 30 - جەلتوقسان كۇنى كاسىپقوي بوكستاعى ەكىنشى ايقاسىن وتكىزەدى دەپ ەستىدىك.
- ءيا، ءساتىن سالسا، ەكىنشى رەت رينگكە شىعۋعا دايىندىقتى باستاپ كەتتىم.
- ول جەكپە- جەك قايدا وتەدى؟ قارسىلاسىڭىز كىم؟
- وزدەرىڭىز بىلەسىزدەر، 30 - جەلتوقسان كۇنى الماتىدا قازاقستاندىق كاسىپقوي بوكسشى قارىنداسىمىز فيرۋزا شارىپوۆا كەزەكتى ايقاسىن وتكىزەدى. مىنە، وسى بوكس كەشى اياسىندا مەن دە ونەر كورسەتەتىن بولدىم. ءبىراق، ازىرگە قارسىلاسىمنىڭ ناقتى كىم بولاتىنى بەلگىسىز. بۇيىرسا، الداعى اپتادا بەلگىلى بولىپ قالادى.
- ءبىرىنشى جەكپە- جەگىڭىز تۋرالى ايتا كەتسەڭىز؟
- العاشقى ايقاسىمدى رەسەي استاناسى ماسكەۋ تورىندە وتكىزدىم. اللانىڭ قۋاتىمەن جەڭىسكە جەتتىم.
- ءوزىڭىز دە سول كەزدە جەڭىسكە دەگەن سەنىم باسىم بولدى ما، الدە قوبالجۋ باسىم بولدى ما؟
- رينگكە شىققانعا دەيىن قوبالجۋ بولدى. ءتىپتى، سالماق جوعالتىپ الدىم دەسەم دە بولادى. ءبىراق، «كوك تۋدىڭ جەلبىرەگەنى» ءانىن اۋەلەتە قويىپ تاستاپ، شارشى الاڭعا بەتتەگەندە رۋحتانىپ كەتتىم. العاشقى ۇرەيىمنىڭ بارلىعى ۇمىت بولدى. قارسىلاسىما قالاي اش قاسقىرداي ۇمتىلعانىمدى دا بىلمەي قالدىم. قازاقتىڭ قانى، قازاقتىڭ جانى ەرلىك پەن جىگەرگە تولى ەكەنىن سوندايدا سەزىنەدى ەكەنسىڭ.. .
- جەڭىستەن كەيىنگى اسەرىڭىزدى ايتا الاسىز با؟
- بويىمدى ءبىر الاپات كۇش كەرنەپ تۇردى. ءوزىمدى قازاق دەگەن باتىر ەلدىڭ بالاسى ەكەنىمدى سەزىندىم.
- ەندى الداعى ۋاقىتتا رينگ پەن ساحنانىڭ قايسىسىن جانىڭىزعا جاقىنىراق ۇستايسىز؟
- بوكستان ءبىر اتاق الىپ كەتۋ ويىم بار. ال ساحنا ول مەن ءۇشىن ماڭگىلىك.
- اڭگىمەڭىزگە راحمەت!
اۆتور:
كۇنسۇلتان وتارباي
