قازاق سيركى 30 جىلدان كەيىنگى ءتول تۋىندىسىن ەرتەگىدەن باستادى - فوتو
بۇگىن الماتىدا ەكسپو-2017 كورمەسىنە ارنالعان قازاق مەملەكەتتىك سيركى ازىرلەگەن «ەر توستىك» لازەرلىك سۋپەر شوۋىنىڭ تۇساۋكەسەرى ءوتتى. اتالعان باعدارلاما 22 - شىلدە مەن 20 - تامىز ارالىعىندا قويىلاتىن بولادى.
«سوڭعى رەت ءبىزدىڭ سيركىمىز ءوز باعدارلاماسىمەن 1972 - جىلى گاسترولعا شىققان. 16 جىل سول باعدارلاماسىمەن گاسترول جاساعان. سودان كەيىن ءوز باعدارلاماسىمەن گاسترولعا شىقپاعان. ەندى «ەر توستىكتى» الماتىدا كورسەتىپ بولعاننان كەيىن، شىمكەنت قالاسىنا ساپارلايمىز، ارى قاراي قازاقستان بويىنشا قويىلىمدى كورسەتۋ جوسپارلانىپ وتىر. الداعى دۇيسەنبى كۇنى قازاق مەملەكەتتىك سيركىنىڭ قۇرىلعانىنا 47 جىل تولادى. كەڭەس وداعى كەزەڭىندە قازاقى ناقىشتاعى كورسەتىلىم ۇزدىك بولىپ تانىلعان. ياعني، ول باعدارلاماعا تەك قازاق سيركىنىڭ ارتىستەرى مەن ونەرپازدارى عانا قاتىسقان. وسى 30 جىلعى ۇزلىستەن كەيىن مىنە، العاش رەت ءوز ارتىستەرىمىزدىڭ قاتىسۋىمەن ازىرلەنگەن ءتول باعدارلامامىزدى حالىققا ۇسىنىپ وتىرمىز»، دەدى «ەر توستىك» شوۋىنىڭ قويۋشى رەجيسسەرى مارينا رەدكو.
باعدارلامادا ايۋلار، ەشكىلەر، يتتەر كوگەرشىندەر ونەر كورسەتتى. سسەناري بويىنشا ەر توستىكتىڭ جولىندا وزگە دە كەيىپكەرلەر سامرۇق قۇس، شالقۇيرىق ات، اق پەرى، دالا ەلفتارى كەزدەستى. سسەناري جەلىسى بويىنشا، جاۋىزدىقتى جەڭىپ شىعاتىن ەر توستىك ەڭ سوڭىندا ارمانىنا جەتىپ، ارۋىنا قوسىلادى. مارينا رەدكو قازاق مەملەكەتتىك سيركى نە ءۇشىن ەر توستىك ەرتەگىسىن تاڭداعانىن ايتتى.
«قازىرگى زاماندا بالالار شەتەلدىڭ كەيىپكەرلەرىن تانيدى دا ءوز قاھارماندارىن بىلمەيدى. ءبىز «ەر توستىك» ارقىلى ۇلتتىق قۇندىلىعىمىزعا بالالاردىڭ دا نازارىن اۋدارعىمىز كەلدى»، - دەيدى م. رەدكو.
«ەر توستىك» قويىلىمىندا كەنجەكەي، ەر نازار، قاراشاش، بەكتورى، مىستان كەمپىر سىندى كەيىپكەرلەر بالالاردىڭ تانىمىن قيال- عاجايىپ ەرتەگى الەمىنە جەتەلەيدى. تەاترالدى قويىلىمنىڭ ۇزاقتىعى 2,5 ساعات.
مارينا رەدكونىڭ ايتۋىنشا، «ەر توستىك» لازەرلىك شوۋىنىڭ ورىنداۋشىلارى 2-6- شىلدە ارالىعىندا استانادا وتكەن «ازيا جاڭعىرىعى -2017» 10 - حالىقارالىق سيرك ونەرى فەستيۆالىندە «التىن» جۇلدەنى جەڭىپ الدى. شوۋدى وتكىزۋگە 100-دەن ادام قاتىسسا، مانەجدە 65 ادام ونەر كورسەتەدى.
