جەلتوقسان وقيعاسىنىڭ قاتىسۋشىلارى «30 جىلدىق» مەدالىمەن ماراپاتتالدى
جيىنعا الماتى قالاسىنىڭ اكىمى باۋىرجان بايبەك، الماتى قالاسى ءماسليحاتىنىڭ دەپۋتاتتارى، جوعارى وقۋ ورىندارى مەن ساياسي پارتيا وكىلدەرى قاتىستى، دەپ حابارلايدى «قازاقپارات». اتالعان شارادا قالا اكىمى ەل تاۋەلسىزدىگىنىڭ مەرەيلى بەلەسىمەن قۇتتىقتاپ، جەلتوقسان قاتىسۋشىلارىن «جەلتوقساننىڭ 30 جىلدىعى» مەدالىمەن ماراپاتتادى.
«ەلباسى نۇرسۇلتان نازاربايەۆ الماتىداعى «تاۋەلسىزدىك تاڭى» مونۋمەنتىنىڭ اشىلۋىنداعى سوزىندە: «جاستاردى الاڭعا شىعۋعا يتەرمەلەگەن جەلتوقسان قازاقستان تاۋەلسىزدىگىنىڭ جارشىسى بولدى. بۇعان ۇلتشىلدىق سيپات بەرۋگە تالپىنىستار جاسالىپ، ۇلتارالىق قاقتىعىس دەپ ءتۇسىندىرۋ پيعىلدارى دا بولدى. مۇلدەم ولاي بولماعانىن تاريحتىڭ ءوزى كورسەتىپ بەردى. جاستار بار بولعانى ادىلەتتىلىكتى، تەڭدىكتى، تاۋەلسىزدىكتى قالادى» دەپ اتاپ وتكەن بولاتىن»، - دەدى ب. بايبەك.
سونىمەن قاتار، قالا باسشىسى جەلتوقساننىڭ سالقىنىندا تاۋەلسىزدىككە تالپىنعان ەرلەردى ەلى ماڭگى قۇرمەتتەيتىنىن اتاپ ءوتتى. بۇگىندە الماتىدا قازاقتىڭ اردا ۇلى قايرات رىسقۇلبەكوۆ پەن قايسار قىزى ءلاززات اسانوۆانىڭ اتىندا كوشەلەر بار. ال بيىل، 1986 -جىلعى جەلتوقساننىڭ 30 جىلدىعىنا وراي، ەلباسىنىڭ تىكەلەي تاپسىرماسىمەن قالا ورتالىعىنداعى كوشەلەردىڭ بىرىنە ەربول سىپاتايەۆتىڭ ەسىمى بەرىلدى.
«مەن جۇرگەن جەرىمدە، جاستاردىڭ اراسىندا ەلباسىمەن ماقتاناتىنىمدى، ماداق تۇتاتىنىمدى ايتىپ جۇرەمىن. ويتكەنى ءبىز 1991 -جىلى ەگەمەندىك الدىق، 11 -جەلتوقسان كۇنى ماسكەۋدە كەڭەس وداعىنىڭ جيىنى بولىپ، تاۋەلسىز ەل بولىپ ءبولىنىپ شىقتىق. 12 -جەلتوقساندا ەلباسىمىز ەلىمىزگە كەلە سالىسىمەن 540- جارلىقتى شىعاردى. ول جەلتوقسان وقيعاسىنا قاتىسقان بارشا ازاماتتار مەن ازاماتشىلاردى اقتاۋ تۋرالى بولاتىن. سول كۇنى بۇل حاباردى ەستىگەننەن كەيىن توبەمىز كوككە جەتىپ، باس كيىمىمىزدى اسپانعا اتتىق. سوندىقتان ءبىز ءوز ەلباسىمىزدى جەلتوقساندىقتار سايلادىق دەپ ايتۋعا بولادى. اينالايىن، جاستار، وسى تاۋەلسىزدىك سىزدەرگە امانات. كەزىندە ءوزىمىز سايلاعان، ءوزىمىز قالاعان قازاقتا ۇل تۋمادى ما دەپ جىلاعانبىز، باس كيىمىمىزبەن كوز جاسىمىزدى سۇرتتىك. ال، 1991 -جىلى تاۋەلسىزدىك العاندا، سول باس كيىمىمىزدى اسپانعا لاقتىرىپ قۋاندىق. جاستار، كۇرەس سىزدەر ءۇشىن بولدى، تاۋەلسىزدىك سىزدەر ءۇشىن بولدى»، - دەدى گۇلباھرام ءجۇنىسوۆا.
سونىمەن قاتار، جەلتوقسان كۋاگەرلەرى تاۋەلسىزدىكتى قادىرلەۋگە شاقىردى. «تاۋەلسىزدىك دەگەن اركىمنىڭ ۇعىمىندا ءار ءتۇرلى. قانشاما اتا- بابالارىمىز ارمانداپ كەتكەن، قوي ۇستىنە بوزتورعاي جۇمىرتقالاعان زاماندا ءومىر ءسۇرىپ جاتىرمىز. سوندىقتان تاۋەلسىزدىكتى قادىرلەيىك. ءبىز ەلباسىمىزدىڭ ساياساتىن قولدايمىز دا، ءاردايىم قولداپ كەلەمىز دە. ەلىمىز امان، جۇرتىمىز تىنىش بولسىن»، - دەدى تالعات رىسقۇلبەكوۆ.
بۇگىندە جەلتوقسانعا قاتىسقاندارعا الەۋمەتتىك جانە ماتەريالدىق تۇرعىدا قولداۋ كورسەتۋ شارالارى مۇمكىندىگىنشە جۇرگىزىلۋدە. جالپى، تاۋەلسىزدىك جىلدارىندا حالىقتىڭ ءال-اۋقاتى ارتىپ كەلەدى. 25 جىل ىشىندە ەلىمىزدە 1400 مەكتەپ پەن 1300 دەنساۋلىق نىسانى بوي كوتەرگەن. 100 ميلليون شارشى مەتردەن استام تۇرعىن ءۇي سالىندى.
اۆتور: الماس مۇقاش ۇلى
