الەمنىڭ 30 مەملەكەتىنىڭ وكىلدەرى استاناداعى كىتاپ كورمەسىندە باس قوستى
قازاقستان رەسپۋبليكاسى مادەنيەت جانە سپورت مينيسترلىگى جانە استانا قالاسى اكىمدىگىنىڭ قولداۋىمەن وتكەلى جاتقان كورمەنىڭ ۇيىمداستىرۋشىسى - «فوليانت» باسپاسى.
ەۋرازيا كەڭىستىگىندەگى ەڭ ءىرى مادەني- اعارتۋشىلىق شارا بولىپ تابىلاتىن «Eurasian Book Fair - 2016» ەۋرازيا حالىقارالىق كورمە- جارمەڭكەسى قازاقستان رەسپۋبليكاسى تاۋەلسىزدىگىنىڭ 25 جىلدىعىنا وراي ۇيىمداستىرىلعان. العاشقى ەۋرازيا كىتاپ جارمەڭكەسى ءىرى كورمە الاڭىندا ت م د، ەۋروپا مەن ازيا مەملەكەتتەرىنىڭ باسپا، كىتاپ ساۋداسى، عىلىمي- اعارتۋشىلىق جانە پوليگرافيا كومپانيالاردىڭ باسىن بىرىكتىردى.
وقىرماندار مەن ساتىپ الۋشىلارعا جاقىن جانە الىس شەت مەملەكەتتەردىڭ كىتاپ شىعارۋ جانە پوليگرافيا سالاسىنداعى جەتەكشى باسپا ۇيلەرىنىڭ زاماناۋي كىتاپ ونىمدەرىنىڭ اسسورتيمەنتى جانە جاڭا تەحنولوگيالارى ۇسىنىلادى. كورمە اشىلۋىنىڭ قۇرمەتتى قوناقتارى قاتارىندا قازاقستان رەسپۋبليكاسى مەملەكەتتىك حاتشىسى گۇلشارا ءابدىقالىقوۆا، مەملەكەتتىك ورگانداردىڭ باسشىلارى، ق ر پارلامەنتى سەناتى جانە ءماجىلىسىنىڭ دەپۋتاتتارى، قازاقستان رەسپۋبليكاسىنداعى ديپلوماتيالىق ميسسيالاردىڭ جەتەكشىلەرى، بەلارۋس رەسپۋبليكاسى اقپارات ءمينيسترىنىڭ ءبىرىنشى ورىنباسارى ي. لۋتسكي، رەسەي ەڭبەك سىڭىرگەن مادەنيەت قايراتكەرى، «گيلديا كنيجنيكوۆ» پرەزيدەنتى، پروفەسسور ب. ەسەنكين جانە ت. ب. بولدى.
ق ر مەملەكەتتىك حاتشىسى گۇلشارا ءابدىقالىقوۆا كورمە-جارمەڭكەنىڭ اشىلۋىندا: «بيىل ەلىمىز ءۇشىن تاريحي بەلەس - قازاقستان تاۋەلسىزدىگىنىڭ 25 جىلدىق مەرەيتويى. بۇل كەزەڭ قازاقستان تاريحى ءۇشىن داۋىرلىك وقيعالارمەن ولشەنەتىن بەيبىتشىلىك پەن كەلىسىمنىڭ شەجىرەسىنە اينالدى. ەل تاۋەلسىزدىگىنىڭ شيرەك عاسىرلىق بەلەسى اسا جاۋاپتى تاريحي مىندەتتى ورىنداۋ كەزەڭىمەن تۇسپا- تۇس كەلىپ وتىر. بيىلعى جىلى جۇزەگە اسىرۋدىڭ پراكتيكالىق كەزەڭى باستالعان ەلباسى نۇرسۇلتان نازاربايەۆ ۇسىنعان بەس ينستيتۋتسيونالدىق رەفورمانىنىڭ تۇپكىلىكتى ماقساتى - ارمان- مۇراتى ورتاق، بولاشاعى ءبىرتۇتاس ۇلت قۇرۋ ەكەنىن اتاپ ءوتۋىمىز كەرەك. پرەزيدەنتىمىزدىڭ سىندارلى ساياساتى ارقاسىندا قازاقستان دۇنيە ءجۇزىنىڭ مەملەكەتتەرىمەن ەكونوميكالىق قانا ەمەس، مازمۇنى تەرەڭ، تاريحي، مادەني بايلانىستار ورناتتى. وسىنىڭ دالەلى رەتىندە بۇگىنگى وتكىزىلىپ وتىرعان ءى ەۋرازيا حالىقارالىق كىتاپ كورمە- جارمەڭكەسى»، - دەپ اتاپ ءوتتى.
«قازاقستان رەسپۋبليكاسىنىڭ پرەزيدەنتى ايتىپ كەتكەندەي، ەۋرازياشىلدىق - مادەني جانە ۇلتتىق بىرتەكتىلىك ساقتالعانداعى الەۋمەتتىك جاڭعىرتۋ مەن ەكونوميكالىق دامۋ بولىپ تابىلادى. سوندىقتان الداعى ۋاقىتتا بولاتىن جارمەڭكەنىڭ كىلت تاقىرىبى رەتىندە ەۋرازياشىلدىق يدەياسى تاڭداپ الىندى»، - دەيدى «Eurasian Book Fair - 2016» ەۋرازيا حالىقارالىق كىتاپ كورمە- جارمەڭكەسى ديرەكتسياسى ديرەكتورىنىڭ ورىنباسارى راۋشان تۇرلىنوۆا. كورمە شەڭبەرىندە كەڭ مادەني باعدارلاما جۇزەگە اسىرىلاتىن بولادى. شارا ۇيىمداستىرۋشىلارىنىڭ اقپاراتىنا قاراعاندا، كورمە- جارمەڭكە جۇمىس ىستەيتىن كۇندەردىڭ ءارقايسىسىنىڭ ءار ساعاتىندا ءتۇرلى مادەني- ساۋىق، عىلىمي شارالار وتكىزىلەدى.
بۇنداي شارالاردىڭ قاتارىنا عىلىمي- تاجىريبەلىك كونفەرەنتسيالار، تۇساۋكەسەرلەر، دوڭگەلەك ۇستەلدەر، تانىمال مادەنيەت قايراتكەرلەرى، جازۋشىلار مەن اقىندار، سونىڭ ىشىندە ادەبيەت سالاسىنداعى نوبەل سىيلىعىنىڭ يەگەرلەرىمەن كەزدەسۋ، فورۋمدار، بايقاۋلار مەن ۆيكتورينالار كىرەدى. كورمەدە ىسكەرلىك سۇحباتتار دا ورىن الادى دەپ كۇتىلۋدە.
- شارا بارىسىندا رەسمي تۇلعالار، باسپا ۇيلەرىنىڭ، كىتاپ ساۋداسى ۇيىمدارىنىڭ باسشىلارى، حالىقارالىق ساراپشىلار، تانىمال جازۋشىلار مەن اقىندار، باسپا جوبالارىن قولدايتىن ۇيىمدار مەن قورلاردىڭ، كىتاپحانا، ءبىلىم بەرۋ جانە عىلىمي قوعامداستىقتاردىڭ وكىلدەرى سالا دامۋىنىڭ وزەكتى ماسەلەلەرىن تالقىلاپ، مەملەكەتتىك، قوعامدىق جانە جانە كاسىپكەرلىك قۇرىلىمداردىڭ رۋحاني- ونەگەلى اعارتۋشىلىق، ءبىلىم جانە مادەنيەت سالاسىندا حالىقارالىق مادەني، ىسكەرلىك بايلانىستارىن جۇزەگە اسىرۋعا بارلىق جاعداي جاسالعان.
