قازاقستاندىق تانىمال تەلەجۇرگىزۋشى ءوز اناسىمەن 30 جىلدان سوڭ تابىستى
ادام تاڭعالارلىق وقيعاسىن تالعات Tengrinews.kz تىلشىسىنە بەرگەن سۇحباتىندا ايتىپ بەردى.
تالعات قۇسپايەۆ 32 جاستا. ول قازىرگى ۋاقىتتا «الماتى» تەلەارناسىندا كەشكى جاڭالىقتاردىڭ جۇرگىزۋشىسى بولىپ قىزمەت اتقارادى. وسىعان دەيىن «حابار» جانە «قازاقستان» تەلەارنالارىندا جۇرگىزۋشى بولعان دارىندى جاس. قۇسپايەۆتىڭ اناسى ءوزى تۋىپ- وسكەن جەردە - قاراقوبدا اۋىلىندا تۇرادى. تالعاتتى كىشكەنتايىنان اكەسى يمانعالي تاربيەلەپ وسىرگەن. كەزىندە ءوزىن تاستاپ كەتكەن اناسىن ىزدەۋگە مارقۇم اكەسى دە، تۋىستارى دا جىلدار بويى توقتاۋ سالىپ كەلىپتى.
قۇسپايەۆتىڭ ايتۋىنشا، اناسىمەن تابىسۋعا ونىڭ باسىنان وتكەن ءبىر وقيعا سەبەپ بولدى. جاقىندا جۇمىس ساپارىمەن استانادان الماتىعا كەلە جاتقان ول كولىك اپاتىنا ۇشىراعان. «تۇنگى ۋاقىتتا كەلە جاتىپ، الماتىعا 250 شاقىرىم قالعان كەزدە رۋلدە قالعىپ كەتتىم. ەسىمدى جيعانىم سول، قارسى باعىتقا شىعىپ كەتكەن ەكەنمىن، ال ماعان قاراما- قارسى جۇك كولىگى كەلە جاتتى. سوڭعى ساتتە تىزگىندى بۇرىپ ۇلگەرىپ، جول جيەگىنە اۋىپ ءتۇستىم، - دەيدى ول ءولىم اۋزىنان قالعان وقيعاسىن بايانداي وتىرىپ. - تەك جاراتقاننىڭ ارقاسىندا امان قالدىم. كولىگىمە دە زاقىم كەلمەدى».
تالعاتتىڭ ايتۋىنشا، بۇل وقيعا وعان الدەقانداي بەلگى بەرگەندەي بولعان. الماتىعا امان- ەسەن جەتكەن ول قارلىعاش ەسىمدى دوسىنا بارۋدى ۇيعارىپتى. ايتۋىنشا، قارلىعاش قاراپايىم ادامدار ادەتتە ءبىلىپ- سەزە بەرمەيتىن قاسيەتكە يە. «مىنە، «سالەم، تالعات» دەپ قارسى العان ول ءۇيىنىڭ تابالدىرىعىنان اتتاي بەرگەنىمدە مەنى ابدەن ساستىرعان سۇراقتاردى قويا باستادى. «سەنىڭ اناڭ نەگە ءوزىن كىنالاپ، قينالىپ ءجۇر؟ نەگە ول سەنى ىزدەپ، كورگىسى كەلەدى؟ ونى ۇزاق ۋاقىت بويى كورمەگەنسىڭ بە، وكپەلەپ جۇرگەننەن ساۋمىسىڭ؟» دەپ سۇراق جاۋدىردى. الايدا مەن ءۇنىمدى شىعارا الماي قالدىم. اقىرى انامدى ءتىپتى دە كورمەگەنىمدى مىڭگىرلەي ايتتىم»، - دەيدى تالعات.
ونىڭ ايتۋىنشا، قارلىعاش تالعاتتىڭ جەكە باسىنداعى جاعدايدان مۇلدەم حابارسىز بولعان. ول ءتىپتى اكەسىنىڭ تالعاتتى ءۇش ايلىق كەزىنەن باستاپ باعىپ- قاققانىن دا بىلمەيدى ەكەن. «ونىڭ ايتقاندارىنا قايران قالدىم. قارلىعاش انامنىڭ ءومىر بويى ءوزىن-ءوزى كىنالاپ، كەزىندە جەتى بالاسىنىڭ بىرەۋىن تاستاپ كەتكەنىنە قاتتى وكىنەتىنىن ايتىپ بەردى. ءيا، انامنىڭ جەتى ۇلى بار، ءۇش اعام جانە مەن ءتورتىنشىمىن، ال مەنەن كەيىن تاعى ۇشەۋى بار. جەتەۋىمىزدىڭ انامىز ءبىر، ال مەن يمانعاليدان تۋعانمىن. اكەم ءوزىنىڭ تۋعان ۇلىن، ياعني مەنى ءوزى اسىرادى»، - دەيدى قۇسپايەۆ.
قارلىعاشتىڭ اڭگىمەسىنەن كەيىن ول اناسىن تابۋدى، وعان ءتىپتى دە وكپەلەمەيتىنىن ايتۋدى ۇيعارعان. تالعات اناسىنا رەنجىمەيدى ەكەن، سەبەبى اكەسى وعان قاجەتتىنىڭ ءبارىن بەردى: تاربيەنى دە، ادامگەرشىلىك قۇندىلىقتاردى دا، ءبىلىمدى دە، 90-جىلدارى تىرشىلىك ەتۋدى دە ۇيرەتىپ، ومىرلىك ساباعىن بەرگەن. «مەن بالا كەزىمنەن بىرەۋگە وكپەلەۋىم كەرەك دەپ وسپەدىم. اكەم انام تۋرالى ەشقاشان جامان ءسوز ايتپاعان. انامنىڭ مەنى تاستاپ كەتكەنىن عانا ايتتى، بولدى... ال ەس بىلگەنىمدە انامدى اكەمنەن ءوزىم سۇرادىم، اكەم ارادا بولعان جاي تۋرالى ءتىس جارىپ ايتپادى. اركىمنىڭ ءوز شىندىعى بار، مەنىڭ ءوزىم قازىر 32 جاستامىن، وسى جاستا كىمنىڭ باسىندا قانداي جاعدايدىڭ وتكەنىن ءبىلۋ ءۇشىن وتكەندى قازبالاعىم كەلمەدى، - دەيدى تالعات. - مەنىڭ اپكەلەرىم، اكەمنىڭ قارىنداستارى انام جايلى ءبىلىپ، ونى ىزدەۋىمە، ارينە، قارسى بولدى. الايدا مەن وزىمە ءومىر سىيلاعان ايەلدى كورگىم كەلدى».
تالعاتتىڭ اناسى البومىن كورسەتتى.
وسى شەشىمىنەن كەيىن تالعات 32 جىل بويى كورمەي كەلگەن اناسىن ىزدەي باستايدى. مۇندا دا وعان ءوزىنىڭ جاقىن ادامى - تەلەۆيزيا سالاسىنا اياق باسقان كۇنىنەن باستاپ اقىل- كەڭەسىن ايامايتىن ۆەنەرا سەرعازينا كومەككە كەلىپتى. ول ونىڭ اكەسى يمانعالي مەن حانزادانىڭ (اناسىنىڭ ەسىمى) تانىسقان اۋىلىنىڭ تۋماسى ەكەن. ىزدەستىرگەننەن كەيىن اقىرى ۆەنەرا تالعاتتىڭ اناسىنىڭ تەلەفون نومەرىن تاۋىپ بەرەدى. باستاپقىدا ول اناسىنا حابارلاسىپ، ۇلى تالعاتپەن كەزدەسۋگە دايىندىعىن سۇراپ بەرىپتى. سول كەزدە اناسى حانزادا بالاسىن ءوز ۇيىندە كۇتەتىنىن ايتقان.
«وسىدان كەيىن مەن اقتوبەگە ۇشتىم، نۇرلان ەسىمدى جەزدەم مال بازارىندا جاقسى قوي تاۋىپ بەردى، مەن جولدا امان قالعانىما شۇكىرشىلىك ەتۋ ءۇشىن جانە قىمباتتى انامنىڭ اماندىعى ءۇشىن قۇربان شالعىم كەلدى. ەگەر ايتۋعا كەلەتىن بولسا، ءدال وسى وقيعا قاسيەتتى قۇربان ايتپەن دە دالمە- ءدال كەلىپ قالدى، وسىعان دا ءبىر تاۋبە ەتكەنىم بولدى دەپ ءتۇسىندىم. 2015 -جىلدىڭ 24 -قىركۇيەگىندە - قۇربان ايتتىڭ ءبىرىنشى كۇنىندە قارىنداسىم اسەل، جەزدەم نۇرلان، ارىپتەسىم ۆەنەرا ءبارىمىز اناما اتتاندىق. ۆەنەرا بالا كۇنى ەستە قالعان باعدارىمەن انام تۇراتىن ءۇيدى تاۋىپ باردى»، - دەيدى تالعات.
ولاردى اناسى داستارحان جايىپ كۇتىپ العان. ۇلى الماتىدان ارنايى ساتىپ العان سىيلىعىن ۇسىنىپ، 32 جىلدان بەرى ايتقىسى كەلگەن ءسوزىن جەتكىزەدى. «وسىلايشا، اناما ەشقانداي وكپەمنىڭ جوقتىعىن ايتتىم. وعان جول- جونەكەي سوقپاعانىمدى، ارنايى، مىنا جارىق الەمدەگى جالعىز اناما بارعانىمدى ايتتىم!»، - دەپ اياقتادى وقيعاسىن تالعات.
ونىڭ ايتۋىنشا، بۇل ومىردە ەشكىمگە رەنىش ساقتاۋدىڭ قاجەتى جوق، كەشىرە ءبىلۋ كەرەك. «ءارقاشان اتا- اناعا تەلەفون سوعىپ، حابارلاسىپ، بارىپ تۇرۋ كەرەك. ءومىر دەگەن سونداي، كەنەتتەن ءۇزىلۋى دە مۇمكىن... بىلەسىزدەر مە، جۇرەگىمدە ساقتالىپ جۇرگەن سىزات كەتتى، جانىم تىنىشتالعانداي بولدى»، - دەپ سىرىن ءبولىستى ول.
