ق ر ۇلتتىق كىتاپحاناسىندا 30 تومدىق تەرمينولوگيالىق سوزدىكتەر توپتاماسىنىڭ تۇساۋكەسەرى وتەدى
وعان اقىن-جازۋشىلار، عالىمدار، قوعام قايراتكەرلەرى مەن ب ا ق وكىلدەرى قاتىسپاق.
«قازاقستان-2050» ستراتەگياسى» جولداۋىندا ەلباسى ن. ءا. نازاربايەۆ: «ءتىلدى زامانعا ساي ۇيلەستىرىپ، تەرمينولوگيا ماسەلەسىنەن كونسەنسۋس ىزدەۋ كەرەك. قازاق ءتىلىنىڭ وسى زاماننىڭ بيىك تالابىنا ساي باي تەرمينولوگيالىق قورىن جاساعان سوڭ، ونى رەت-رەتىمەن، كەزەڭ-كەزەڭىمەن قوعامدىق ءومىردىڭ بار سالاسىنا باتىل ەنگىزۋىمىز كەرەك»، - دەپ اتاپ ءوتتى.
ەلباسىنىڭ تاپسىرماسى ورىندالىپ، قازاق ءتىلىنىڭ تەرمينولوگيالىق قورى جاسالدى.
2012-2014-جىلدارى مادەنيەت جانە سپورت مينيسترلىگىنىڭ تىلدەردى دامىتۋ جانە قوعامدىق-ساياسي جۇمىس كوميتەتىنىڭ تاپسىرىسى نەگىزىندە پەداگوگيكالىق عىلىمدار اكادەمياسى 1999-2000-جىلدارى جارىق كورگەن سوزدىكتەردى ءارى قاراي جەتىلدىرۋ جانە تولىقتىرۋ جۇمىستارىن جۇرگىزىپ، عىلىم مەن تەحنيكانىڭ، ءوندىرىس پەن مادەنيەتتىڭ بارلىق سالالارىن قامتىيتىن 30 تومدىق سالالىق قازاقشا-ورىسشا، ورىسشا-قازاقشا تەرمينولوگيالىق سوزدىكتەر توپتاماسى ازىرلەندى. باستى ماقسات - بۇرىن جارىق كورگەن سوزدىكتەر توپتاماسىن ساراپتامادان وتكىزىپ، وڭدەپ، ءار تومداعى تەرميندەر سانىن 9000 عا، ءتىپتى 11-12 مىڭعا دەيىن تولىقتىرۋ بولدى. سوزدىكتەر توپتاماسىن «قازاقپارات» باسپا كورپوراتسياسى باسىپ شىعاردى. 30 تومدىق سوزدىكتەر توپتاماسىن دايىنداۋعا 52 مەكەمەدە - جوعارى وقۋ ورىندارىندا، عىلىمي زەرتتەۋ ينستيتۋتتارىندا، اكادەميالاردا، مينيسترلىكتەر مەن پارلامەنتتە، سالالىق مەكەمەلەردە جۇمىس جاسايتىن 144 عىلىم دوكتورى، 120 عىلىم كانديداتى ات سالىستى. جالپى 350 دەي ادام جۇمىس جاسادى.
بۇل سوزدىكتەردە قازاق ۇلتىنا عانا ءتان سالت-داستۇرىمىزگە، مادەنيەتىمىزگە، تۇرمىس-تىرشىلىگىمىزگە قاتىستى، وزگە تىلدەردە، سونىڭ ىشىندە ورىس تىلىندە مۇلدەم كەزدەسپەيتىن كوپتەگەن تەرمين-سوزدەر ولار ورىس تىلىنە اۋدارىلماي، ورىس ءتىلىنىڭ ورفوگرافياسىنا سايكەستەندىرىلگەن قازاق ءسوزى تۇرىندە جۇيەلەنىپ بەرىلگەن. بۇل قازاق ءتىلىنىڭ الەم تىلدەرىن بايىتا تۇسۋگە مۇمكىندىگىنىڭ دە مول ەكەندىگىن كورسەتۋگە تىرىسقان تالپىنىس بولدى.
