قازاقستان دامىعان 30 ەلدىڭ قاتارىنا ەنۋگە جاقىن
سوڭعى 4 جىلدا 4 مىڭعا جۋىق يننوۆاتسيالىق جوبالار ۇسىنىلىپ، ءبىرقاتارى جۇزەگە اسىرىلعان. وسىنداي يننوۆاتسيانىڭ داڭعىل جولىندا 60- جىلدارى يزرايل دە ءوز تاجىريبەسىن كورسەتكەن. بۇگىندە بۇل ەل 16-ورىندا.
شاعىن كومپانيالار مەن امبيتسياسى مىقتى ادامداردىڭ ارقاسىندا يزرايلدەگى IT تەحنولوگيا نارىعى ەكونوميكانىڭ قوزعاۋشى كۇشىنە اينالدى. بۇل سالادا جەتىستىككە جەتكەندەردىڭ قۇپياسى اسا قيىن ەمەس.
توپتاسقان جاس ماماندار ويلاپ تاپقان جاڭالىعىن دامىتىپ، ونى جۇزەگە اسىراتىندارعا ساتىپ جىبەرەدى. سونداي جاڭالىقتىڭ ءبىرى «ەۆيدجيلو» فيرماسىندا بولدى. ولاردىڭ توتەنشە جاعدايلاردى ەرتە ەسكەرتۋگە ارنالعان جۇيەسى جاھاننىڭ ناعىز جاڭالىعىنا اينالدى. مىسالعا، بىلتىر وسى جۇيەنىڭ ارقاسىندا چيليدە بولعان جەر سىلكىنىسىنەن جۇزدەگەن ادام امان قالدى. گاي ۆايس، جوبا جاساۋشى:
- مەن ادامنىڭ ويىنا كىرىپ شىقپايتىن دۇنيە جاساعان يزرايلدىكتەردى تالاي كەزدەستىردىم. سوندىقتان بىزدە بۇل تۇرعىدان العاندا قيىن ەمەس. «نوۋ- حاۋ» ويلاپ تاۋىپ، ودان جاقسى تابىسقا كەنەلۋگە بولادى.
يزرايلدەگى العاشقى IT جوبالار 1989 - جىلدارى دامي باستادى.
ال قازىر مۇنداعى ستارتاپ جوبالار جاڭبىردان كەيىنگى ساڭىراۋ قۇلاقتاي كۇن ساناپ كوبەيىپ كەلەدى.
يۋريي لەگكوۆ، ەكونوميست:
- يزرايلدىك IT تەحنولوگيا سالاسىنىڭ العاشقى ماماندارى كەڭەس زامانىندا-اق قالىپتاسقان. بىزدە ءوندىرىس جوق، سوندىقتان ءبىز تەحنولوگيالاردى ساتامىز. سول سەبەپتى بۇل سالا تابىس كوزىنىڭ بىرىنە اينالىپ وتىر.
«قازاقستان مەن يزرايل ارىپتەستىگى جاڭا تەحنولوگيالار سالاسىندا دا جالعاسىن تاۋىپ جاتىر. اسىرەسە EXPO-2017 كورمەسى قارساڭىندا ەلىمىزدە يننوۆاتسيالىق تەحنولوگيالار داميتىن بولادى»، - دەيدى يزرايلدىك ساراپشىلار.
ميحاەل روە، يزرايلدىڭ ساۋدا-ونەركاسىپ پالاتاسىنىڭ ءتوراعاسى:
- بۇل تۇرعىدان العاندا قازاقستان مەن ءيزرايلدى سالىستىرۋعا بولمايدى. مەنى تاڭ قالدىراتىنى، قازاق ەلى اۋىلشارۋاشىلىعى سالاسىن دا ءارى ونەركاسىپتى دە قاتار دامىتىپ وتىر. ءتىپتى IT تەحنولوگيانىڭ دا قىر-سىرىن مەڭگەرە باستادى. سوندىقتان مەنىڭ ويىمشا، ءسىزدىڭ ەل جاڭاشىلدىقتى دامىتۋدا قالىس قالمايدى.
ستاتيستيكاعا سۇيەنسەك، ءبىرقاتار يزرايلدىك فيرما ءوزىنىڭ تىڭ جاڭالىعىن قوماقتى باعاعا ساتىپ ۇلگەرگەن. مۇندا بيزنەسىن دوڭگەلەتۋگە قۇلىقتى ەشكىم جوق. «نوۋ- حاۋ» ويلاپ تاۋىپ، سونى ساتۋ ارقىلى اقشا تابادى. ال قازاقستاندا بۇل تۇرعىدان العاندا وزگەشەلىك كوپ. ستارتاپ جوبالاردى ەڭ ءبىرىنشى ەل ىشىندە جۇزەگە اسىرۋعا تىرىسادى.
www.24.kz
