شىمكەنتتە پالاۋدىڭ 30 عا جۋىق ءتۇرى ازىرلەندى - فوتو
شارانى بەيبىتشىلىك جانە كەلىسىم جول كارتاسىنىڭ شەڭبەرىندە وبلىستىق وزبەك ۇلتتىق مادەني ورتالىعى ۇيىمداستىردى جانە مۇنى قازاقستان حالقى اسسامبلەياسىنىڭ مەرەيتويىنا ارنادى.
«28 ادام اسپازدىق شەبەرلىكتەرىن كورسەتتى. ولاردىڭ ەكەۋى - وزبەكستاننان، قالعاندارى وڭتۇستىك قازاقستان وبلىسىنىڭ ءار اۋداندارىنىڭ اسپازدارى. شىمكەنتتەن دە قاتىسۋشىلار بار»، - دەپ حابارلادى وزبەك ۇلتتىق مادەني ورتالىعىنىڭ باسشىسى يكرام حاشيمجانوۆ.
پالاۋدى دايىنداۋ ءۇشىن 3 كەلى كۇرىش قاجەت. قاتىسۋشىلار ناتيجەسىندە 340 كەلى پالاۋ ازىرلەگەن. ءار تاعامنىڭ وزىنە ءتان ەرەكشە ءدامى بولعان. مۇندا پرەزيدەنتتىك، سايرامدىق، تاشكەنتتىك توي پالاۋى، وزبەك پالاۋى سياقتى تاعامدار ۇسىنىلدى. سونىمەن بىرگە ماحاببات، دوستىق، بىرلىك پالاۋى ءپىسىرىلدى.
ۇزاققا سوزىلعان كەڭەسۋدەن كەيىن ءادىلقازىلار شىمكەنتتىك عانيەۆتار وتباسىنىڭ پالاۋىن ۇزدىك دەپ تانىدى. ولار شىعىس تاعامىن ازىرلەۋ قۇپياسىن ۇرپاقتان-ۇرپاققا تابىستاپ كەلەدى. وتباسى اپتاسىنا ءبىر رەت پالاۋ ازىرلەۋدى داستۇرگە اينالدىرعان. ول كەزدە داستارقان باسىنا بارلىق وتباسى مۇشەلەرى جينالادى.
