فارفور جاساۋ ونەرىن 30 مينۋتتا ۇيرەنۋگە بولادى، ال قالعانى اۆتوردىڭ قيالىنا بايلانىستى - قىتايلىق شەبەر جۋن جىنحۋا
تەحنولوگيالىق تۇرعىدان - كۇردەلى، جوعارى تەمپەراتۋرالى ىستىق پەشتى تالاپ ەتەتىن فارفور بۇيىمدارىن جاساۋدىڭ تەحنولوگيالىق ءۇردىسى تەوريامەن ءتۇسىندىرىلدى. ول بىرنەشە عاسىرلار بۇرىن قىتايداعى فارفوردىڭ پايدا بولۋ تاريحىنا قىسقاشا توقتالىپ ءوتتى. پراكتيكالىق ساباقتا دايىن فارفور تاباعىن اشەكەيلەۋدى ۇيرەتتى.
ساباق وتكىزبەس بۇرىن ول كورەرمەندەرگە ءوزىنىڭ كومەكشىلەرىمەن بىرگە فارفور بۇيىمدارىنىڭ كورمەسىن ۇسىندى، وندا كوزدىڭ جاۋىن الاتىن فارفور كارتينالار، ۆازالار، سەرۆيزدەر مەن تاعى باسقا تاماشا بۇيىمدار بار.
ايفون جارىعىمەن فارفور شىنىاياعىنىڭ قالاي جارقىرايتىنىن كورسەتتى، ەكى كەسەنى ءبىر-بىرىنە تيگىزگەندەگى ناعىز فارفوردىڭ تازا ءۇنىن تىڭداتتى.
شەبەردىڭ ايتۋىنشا، فارفور ونەرى قىتايعا جازۋ-سىزۋ بولماعان كەزدە پايدا بولعان، فارفور ونەرى ەڭ كونە بەس قولونەردىڭ بىرىنە جاتادى. «فارفورمەن ءبىز مادەنيەتىمىزدى كورسەتەمىز، ەرتەدە قىتاي يمپەراتورلارى فارفور ارقىلى اقپارات الماسقان، شەجىرە قالىپتاستىرعان»، - دەدى شەبەر.
«سىزدەر بىزگە قىتايلىق دەسەڭىزدەر، حالىقارالىق دەڭگەيدە ءبىزدى «China» دەپ اتايدى، ونىڭ ماعىناسى - فارفور دەگەندى بىلدىرەدى. قىتايلىق فارفور قاي كەزدە بولسا دا جوعارى باعالاندى، ودان جاسالعان بۇيىمدار ءتىپتى حرۋستالدان دا قىمبات. بەلگىلى ءبىر تەحنيكانى مەڭگەرگەن شەبەر بالشىقتان نازىك، ادەمى بۇيىم جاساپ شىعارادى. ارينە، 6-7- عاسىرلاردا فارفور دايىنداۋعا اسا ءمان بەرىلمەسە، بىرتىندەپ ول ەرەكشە ونەرگە اينالدى».
جۋن جىنحۋا بالشىقتان تاباق جاساۋ ءۇشىن الدىمەن ونى كۇيدىرىپ، اشەكەيلەپ، سوسىن قايتادان كۇيدىرۋ قاجەت ەكەنىن ايتادى. «ونى 30 مينۋتتا ۇيرەنۋگە بولادى، ال قالعانى شەبەردىڭ قيالىنا بايلانىستى. بۇل ونەر ەرەكشە شەبەرلىكتى، شىدامدىلىقتى، ىقتياتتىقتى قاجەت ەتەدى»، - دەدى شەبەر قۇپياسىمەن ءبولىسىپ.
جۋن جىنحۋا اسسيستەنتى اق بالشىقتان جاسالعان قۇمىرانىڭ قالاي جاسالعانىن كورسەتىپ جاتقاندا، شەبەر ارنايى بوياۋلارمەن، قىلقالاممەن ساناۋلى سەكۋندتا-اق تارەلكەنى بىردەن كوز تارتار قىتايلىق پەيزاجعا اينالدىردى.
كەيىننەن، قازاقپارات تىلشىسىنە سۇحبات بەرۋ بارىسىندا شەبەر جۋن جىنحۋا باسەكەلەستىكتەن قاشپايتىنىن مالىمدەدى، كەرىسىنشە عالامتور بويىنشا شەبەرلىك سىنىبىن وتكىزۋگە ءازىر ەكەندىگىن جەتكىزدى.
ونىڭ جاسى 36 دا، فارفور قولونەرىمەن 20 جىلدان ارتىق ۋاقىت اينالىسىپ كەلەدى. وعان بۇل ونەردى تۋىسقان اعاسى ۇيرەتكەن ەكەن. ودان كەيىن ول 5 جىل فارفور ونەر مەكتەبىندە ءدارىس العان. ول وتانى شاۋەشەكتە تاماشا تۋىندىلارىن جيناقتاپ، باسقالاردى وسى ونەرگە باۋلىپ، وقىتىپ جۇرگەنىن ايتتى.
قولىندا تۇمارى بار شەبەر بۋددا فارفور ونەرىن ۇشتاي تۇسۋگە جاردەمدەسەدى دەپ سانايدى.
