ەلورداداعى «تۇلپار- تالگو» زاۋىتى 306 ۆاگون شىعارعان

 2011 - جىلدىڭ جەلتوقسانىندا ىسكە قوسىلعان زاۋىت بۇگىندە ءوندىرىسىن ورگە باستىرىپ وتىر. سوڭعى 3 جىلدىڭ ىشىندە 306 ۆاگون شىعارىپ، قولدانىسقا بەردى. بۇل - مونتاج قۇراستىرۋ سەحىنىڭ ءبىر بولىمشەسى.

بۇكىل ەلەكترلىك، سلەسارلىق جانە جىلۋ جۇيەلەرىنىڭ قۇرىلعىلارى وسى جەردە جينالادى. ناقتىراق ايتقاندا، كۋپە مەن ۆاگوننىڭ پەشتەرى، جارىق بەرەتىن شامدار مەن ەلەكترلىك قوراپتار جانە جاتىن توسەكتەر وسىندا قۇراستىرىلادى. بارلىق قۇرىلعىلار مەن جابدىقتار تولىق جينالىپ بولعان سوڭ، سوڭعى تەكسەرىستەن وتەدى. ودان كەيىن ۆاگوندارعا ورنالاستىرىلادى.

 الماس جاكيلين، باقىلاۋ، ولشەۋ جانە اۆتوماتتاندىرۋ قۇرىلعىلارىنىڭ ۇيلەستىرۋشىسى:

- وزدەرىڭىز كورىپ وتىرعانداي، بۇل ۆاگون كەرەكتى قۇرال- جابدىقتارمەن جانە بولشەكتەرمەن تولىق قامتىلعان. مەنىڭ قىزمەتىم - وسى ۆاگونداعى جارىق جۇيەسى مەن باسقا دا ۆاگونعا كەرەكتى جۇيەلەردىڭ جۇمىس ىستەۋ قابىلەتىن تەكسەرۋ.

سونىمەن قاتار كۋپەدەگى جىلۋ بەرۋ جۇيەلەرى دە، جارىق بەرۋ شامدارى دا تولىق قويىلىپ بىتكەن. بۇل 2-قاباتتاعى جولاۋشىعا ارنالعان توسەك- ورىن بولىپ ەسەپتەلەدى. بۇل جەردە تالاپتارعا ساي توسەمە قويىلعان. ءاۋ باستان جولاۋشىلار ۆاگوندارىن شىعاراتىن زاۋىت حالىقارالىق ساپا ستاندارتتارىنا سايكەستەندىرىلىپ جوبالانعان. سوندىقتان «تالگونىڭ» جاڭا ۆاگوندارى ەۋروپا ستاندارتتارىنا تولىق جاۋاپ بەرەدى. مۇنداعى ۆاگوندار ساعاتىنا 200 شاقىرىم جىلدامدىققا نەگىزدەلىپ جاسالعان.

 «بۇل زاۋىتتىڭ ت م د كەڭىستىگىندە انالوگى جوق. ۆاگونداردى ورنالاستىرۋ مەن جيناقتاۋ، بولشەكتەردى جەتكىزۋ لوگيستيكاسى، سونداي- اق جوعارى تەحنولوگيالىق جابدىقتاردىڭ زاۋىتتا ءتيىمدى ورنالاستىرىلۋى ۆاگونداردىڭ ساپالى جيناقتالۋىنا مۇمكىندىك بەرەدى»، -  دەيدى زاۋىت ماماندارى.  ۇكىمەتتىڭ 2014 - جىلعى قاۋلىسىنا سايكەس، وتاندىق ۇلەس 14 پايىزدى قۇراۋ كەرەك بولسا، بۇگىندە بۇل مەجە 24- پايىزدى ەڭسەرىپ وتىر.

ەلىمىزدىڭ الەۋمەتتىك، ەكونوميكالىق جاعدايىن جاقسارتۋدىڭ بىردەن- ءبىر جولى - ۆاگونداردىڭ بارلىق تەتىگىن وزىمىزدە شىعارۋ. 2020 - جىلعا دەيىن ىشكى نارىقتى تولىعىمەن ءوزىمىزدىڭ ۆاگوندارمەن الماستىرۋ ماقساتى قويىلسا، ءارى قاراي ونى شەتەلگە شىعارۋ جوسپارى قويىلۋدا. قازىر سونىمەن جۇمىس ىستەپ جاتقان ازاماتتار بار. ويتكەنى سەرتيفيكاتتاۋ، تالاپتاۋ جۇمىستارى جۇرگىزىلۋدە. سونىمەن قاتار زاۋىت بيىلدان باستاپ حالىقتىڭ سۇرانىسىنا وراي ۆاگونداردىڭ ەنى مەن كولەمىن ۇلكەيتپەكشى. بۇرىن دايىن ۆاگونداردى قابىلدايتىن بولسا، ەندى ۆاگونداردى بوياۋ، ىشكى جابدىقتارىن قۇراستىرۋ، دانەكەرلەۋ سياقتى جۇمىستاردىڭ بارلىعى زاۋىتتا جاسالادى.

«تالگو» زاۋىتى سوڭعى 3 جىلدا 306 ۆاگون شىعارىپ، پايدالانۋعا بەرگەن. ولار بۇگىندە ەلىمىزدىڭ بارلىق ايماعىنا قاتىناۋدا. كاسىپورىن تولىق قۋاتىنا كوشكەندە، جىلىنا 150 جولاۋشىلار ۆاگونىن شىعارۋدى جوسپارلاپ وتىر. بۇگىنگى كۇنى وندا 254 ادام قىزمەت جاساسا، بولاشاقتا تاعى دا 400 گە جۋىق ادام جۇمىسپەن قامتىلماق. «قازاقستاندا جاسالعان» مارتەبەسىن يەلەنگەن ۆاگونداردىڭ يگىلىگىن بۇگىن ەل كورىپ، ريزاشىلىعىن ءبىلدىرىپ وتىر.

 اۆتورلارى: جاندوس جۇمابەك، ايات دۇيسەنبايەۆ
 www.24.kz

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى