شىعىس قازاقستاندا 300 گەكتارعا جايىلعان تاعى ءبىر دالا ءورتى اۋىزدىقتالماي جاتىر

ش ق و توتەنشە جاعدايلار دەپارتامەنتى باسپا ءسوز قىزمەتىنىڭ مالىمەتىنە سۇيەنسەك، 5- قىركۇيەك كۇنى كەشكى ۋاقىتتا شىققان ءورت كۇرشىم اۋدانىنداعى «مارقاكول» ورمان شارۋاشىلىعىنا، «بوبروۆكا» ورمانشىلىعى مەن ءتوسقايىڭ اۋىلدىق وكرۋگى اۋماعىنا جايىلعان.

«الدىن الا دەرەك بويىنشا جالپى اۋدانى 300 گەكتاردى قۇرايتىن قىزىل جالىن اعاش، بۇتا مەن ءشوپتى شارپىپ جاتىر. ەڭ جاقىن ورنالاسقان ءتوسقايىڭ اۋىلى مەن وت وشاعىنىڭ اراسى - 10 شاقىرىم. ەلدى مەكەنگە ەشقانداي قاۋىپ ءتونىپ تۇرعان جوق»، - دەلىنگەن حابارلامادا.

قازىرگى ۋاقىتتا ءورت سوندىرۋشىلەر، ورمانشىلار، جەرگىلىكتى اتقارۋشى ورگان وكىلدەرى مەن پوليتسەيلەر وقيعا ورنىندا ءتىلسىز جاۋمەن كۇرەسىپ جاتىر. بارلىعى 114 ادام مەن 17 تەحنيكا جۇمىلدىرىلعان. سونداي-اق «ەۋروكوپتەر» جانە مي-2 تىكۇشاقتارى ىسكە قوسىلدى. وسكەمەن قالاسىنان جەكە قۇرامنان 46 ادام مەن 6 تەحنيكا كومەككە كەلىپ جەتتى.

ەسكە سالساق، بۇعان دەيىن شىعىس قازاقستان وبلىسىنىڭ التاي اۋدانىندا ءىرى دالا ءورتى شىققانىن حابارلاعان بولاتىنبىز. ول جاقتا دا ءورت ازىرگە اۋىزدىقتالماي جاتىر.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى