حاكەرلەر ءىرى كومپانيانىڭ شوتىنان 300 ميلليون تەڭگە ۇرلادى - سانجار ءادىلوۆ
بۇل تۋرالى ق ر ىشكى ىستەر مينيسترلىگى تەرگەۋ دەپارتامەنتىنىڭ باسشىسى سانجار ءادىلوۆ ايتتى، دەپ حابارلايدى قازاقپارات ءتىلشىسى.
«قارجىلىق مونيتورينگ اگەنتتىگىمەن بىرلەسە نەسيەلەۋ، بانك قىزمەتى ءارى موبيلدىك اقشا اۋدارۋ سالاسىنداعى الاياقتىققا توسقاۋىل قويۋ بويىنشا ءتيىستى شارالار قابىلدانىپ جاتىر. قازىرگى كەزدە تەرگەۋ دەپارتامەنتى ءىرى اكتسيونەرلىك قوعامنىڭ شوتتارىنان 300 ميلليون تەڭگەدەن استام قاراجاتتى جىمقىرعان توپقا قاتىستى قىلمىستىق ءىستى تەرگەپ جاتىر. قاراجاتتى جىمقىرۋ كۇدىگىنە ءۇش ادام ىلىكتى، ولار قاماۋعا الىندى»، - دەدى ول ونلاين رەجيمدەگى بريفينگىدە.
بەلگىلى بولعانداي، الماتى قالاسىنىڭ تۇرعىندارى رەسەيلىك حاكەرمەن بىرگە اكتسيونەرلىك قوعامنىڭ ينتەرنەت- رەسۋرسىندا جالعان 14 اككاۋنت قۇرعان. وسى ارقىلى اقپاراتتىق تولەم جۇيەسىنە كىرگەن. «وسىدان كەيىن قوسارلانعان ترانزاكتسيالار قۇرىپ، زاڭسىز تۇردە قاراجاتتى ەلىمىزدەگى جانە رەسەيدەگى ەكىنشى دەڭگەيلى بانكتەردىڭ تولەم كارتالارىنا اۋدارىپ وتىرعان. سونىمەن قاتار قاراجات قازاقستاندىق بايلانىس وپەراتورلارىنىڭ ابونەت نومىرلەرىنە اۋدارىلعان»، - دەدى س. ءادىلوۆ.
كۇدىكتىلەر قاراجاتتى قولما-قول اقشاعا اينالدىرىپ، تولەم كارتاسىن ىزدەۋمەن، SIM كارتالار ساتىپ الۋمەن، ۇرلانعان اقشانى بيتكوينعا ايىرباستاۋمەن جانە ونى كريپتواميانعا اۋدارۋمەن اينالىسقان. قازىرگى كەزدە تەرگەۋ امالدارى جالعاسىپ جاتىر، سونداي-اق رەسەيدىڭ قۇقىق قورعاۋ ورگاندارىمەن بىرلەسە بارلىق كۇدىكتىلەردى ۇستاۋ جۇمىستارى اتقارىلىپ وتىر. ونىڭ ايتۋىنشا، الاياقتىقتىڭ ۇلەسى قىلمىستاردىڭ اراسىندا 27 پايىزعا جەتىپ وتىر. جالپى قىلمىستىق قۇقىق بۇزۋشىلىقتار سانى 20 پايىزعا تومەندەگەنىنە قاراماستان، الاياقتىق قىلمىس دەڭگەيى وسكەن. وسى ورايدا ينتەرنەت الاياقتىق فاكتىلەرى كوبەيگەنى بايقالدى.
«بۇل قىلمىسپەن كۇرەستىڭ تيىمدىلىكتى ارتتىرۋ ءۇشىن ىشكى ىستەر ورگاندارى جەدەل- پروفيلاكتيكالىق ءىس- شارالاردى تۇراقتى وتكىزەدى. پوليتسيانىڭ وڭىرلىك دەپارتامەنتتەرىندە ينتەرنەت الاياقتى انىقتاۋ بويىنشا مامانداندىرىلعان تەرگەۋ توپتارى قۇرىلدى. قازىرگى كەزدە ولار اتالعان قىلمىستاردى اشۋعا قاتىستى ءوز ۇلەسىن قوسىپ كەلەدى»، - دەدى ول. س. ءادىلوۆ اتالعان سالاداعى قۇقىق بۇزۋشىلىقتارعا توسقاۋىل قويۋ ماقساتىندا ىشكى ىستەر مينيسترلىگىنىڭ باعدارلاماسى بەكىتىلگەنىن ايتتى.
اۆتور: رۋسلان عابباسوۆ
