جامبىل وبلىسىندا شوپان 300 قويىمەن بىرگە اداسىپ كەتكەن
جامبىل وبلىسى مويىنقۇم اۋىلىنىڭ تۇرعىنى «سۇڭقار» شارۋا قوجالىعىنىڭ جەتەكشىسى ءوزىنىڭ قول استىندا جۇمىس اتقاراتىن شوپانى 13 -ناۋرىز كۇنى مەركى اۋدانى قۇمدى القابىندا، مالىن باعىپ كەتىپ، سودان قايتىپ كەلمەگەنى بويىنشا پوليتسيا بولىمشەسىنە حابار بەرگەن.
«اتالعان دەرەك بويىنشا مەركى جانە مويىنقۇم اۋداندىق پوليتسيا بولىمشەسىنىڭ قىزمەتكەرلەرىمەن جەدەل تەرگەۋ توبى قۇرىلىپ، 300 باس قويىمەن جوعالىپ كەتكەن شوپاندى ىزدەستىرۋ جۇمىستارى جۇرگىزگەن. 15 - ناۋرىز كۇنى اداسىپ قالعان شوپاندى مالىمەن اراعا ەكى كۇن وتكەن سوڭ تاپقان» دەلىنگەن وبلىستىق پوليتسيا دەپارتامەنتى باسپا ءسوز قىزمەتىنىڭ حابارلاماسىندا.
اداسىپ قالعان شوپان مەن «سۇڭقار» شارۋا قوجالىعىنىڭ جەتەكشىسى مەركى، مويىنقۇم اۋدانىنىڭ پوليتسيا ءبولىمى تەرگەۋ بولىمشەسى، كريمينالدىق پوليتسيا بولىمشەسى جانە ۋچاسكەلىك پوليتسيا قىزمەتكەرلەرىنە ءوزىنىڭ العىسىن بىلدىرۋدە.
