قاراعاندى وبلىسىندا شاحتادا قالىپ قويعان 300 دەن استام كەنشى جەر بەتىنە شىعارىلدى
ونىڭ ىشىندە «تەنتەك» شاحتاسى دا بىرنەشە ساعاتقا جارىقسىز قالىپ قويدى، دەپ حابارلايدى قازاقپارات ءتىلشىسى.
30 -ساۋىردە قاتتى جەلدىڭ سالدارىنان شاحان كەنتىندەگى «قاراعاندى جارىق» ج ش س قوسالقى ستانسياسىنىڭ شاتىرى قۇلادى. شاتىردىڭ ءبىر بولىگى قوسالقى ستانسيالاردىڭ جابدىقتارىنا قۇلاۋىنا بايلانىستى اپاتتى جاعداي تۋىنداپ، جارىق ءوشىرىلدى. ناتيجەسىندە شاحان كەنتىنىڭ، «سارانكومۋنسەرۆيس» كاسىپورنى (ساران ق. سۋمەن قامتاماسىز ەتۋ)، «تەنتەك» شاحتاسى مەن كەنتتىڭ تۇرعىندارى جارىقسىز قالدى. اپاتتىق جاعداي كەزىندە «تەنتەك» شاحتاسىندا 331 ادام جەر استىندا قالىپ قويدى، الايدا شاحتانىڭ جەلدەتكىشى جۇمىسىن توقتاتپاعان. شاحتا باسشىلىعى قابىلداعان شارالاردىڭ كومەگىمەن ادامداردى باستى كولبەۋ وقپان (شامامەن 1,5 ك م) ارقىلى شىعارۋ جۇمىستارى ۇيىمداستىرىلدى. قازىرگى ۋاقىتتا بارلىق كەنشىلەر جەر بەتىنە شىقتى. شاحان كەنتىندە، «سارانكومۋنسەرۆيس» (ساران ق. سۋمەن جابدىقتاۋ) كاسىپورنىن ەلەكتر قۋاتىمەن جابدىقتاۋ قالپىنا كەلتىرىلدى. قوسالقى ستانسياداعى ەلەكترقۋاتى تولىعىمەن ساعات 22.00-گە دەيىن قالپىنا كەلتىرىلەدى دەپ كۇتىلۋدە.
