تۇرىكتىڭ 300 ميلليون كورەرمەنى بار تەلەارناسى تۇركىستان تۋرالى فيلم ءتۇسىردى
اكىمدىكتىڭ وكىلدەرىنىڭ ايتۋىنشا، تەلەارنا وكىلدەرى و ق و- داعى جۇزەگە اسىرىلىپ جاتقان مەملەكەتتىك باعدارلامالاردىڭ ورىندالۋ بارىسى مەن جالپى ايماقتىڭ دامۋ كورسەتكىشتەرى تۋرالى دا ماعلۇماتتار العان.
«وڭتۇستىك قازاقستان وبلىسى تۋرالى ارنايى باعدارلاما ازىرلەپ جۇرگەن شىعارماشىلىق توپ ءوڭىردىڭ ەكونوميكالىق دامۋ، يندۋستريا جانە تۋريزم سالالارى بويىنشا ءۇش باعىتتاعى جۇمىستارىنىڭ جايىن جەر-جاھانعا كورسەتپەك»، - دەيدى اكىمدىكتەگىلەر.
سونداي-اق، «TRT AVAZ» تەلەارناسىنىڭ شىعارماشىلىق ۇجىمى وبلىس اكىمى جانسەيىت تۇيمەبايەۆتان سۇحبات الىپتى. سۇحباتىندا اكىم ولكەنى دامىتۋداعى بولاشاق جوسپارلارىن ايتىپ بەرىپ، 300 ميلليون كورەرمەنى بار تەلەارنا ارقىلى تۇركى باۋىرلاس ەلدەردى قازاقستاننىڭ ونىڭ ىشىندە قوناقجاي وڭتۇستىكتىڭ تۋريستىك مەكەندەرىن تاماشالاۋعا شاقىردى.
الايدا فيلمنىڭ قاشان شىعاتىنى جايلى ايتىلماي وتىر.
ايتا كەتەيىك، «TRT AVAZ» حالىقارالىق تەليەۆيزياسى تۇركيا رەسپۋبليكاسىنىڭ 7 تىلدە، سونىڭ ءبىرى قازاق تىلىندە حابار تاراتاتىن ەڭ ءىرى تەلەارناسى بولىپ تابىلادى. ەۋروپا مەن ورتا ازيا اۋماعىنا تارايتىن، ياعني ولار باۋىرلاس مەملەكەتتەر - ءازىربايجان، قازاقستان، وزبەكستان جانە قىرعىزستان سىندى سەگىز ەلگە حابار تاراتادى. وندا اتالعان رەسپۋبليكالاردىڭ ۇلتتىق داستۇرلەرى مەن ونەرى، دەرەكتى فيلمدەرى مەن مۋزىكالىق باعدارلامالارى كورەرمەن نازارىنا ۇسىنىلادى.
