بيىل قازاقستاندا 300 دەن اسا ادەپسىز مەملەكەتتىك قىزمەتكەر انىقتالدى
بۇل تۋرالى باسپا ءسوز ءماسليحاتىندا ق ر مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگى مەملەكەتتىك قىزمەت سالاسىنداعى باقىلاۋ دەپارتامەنتىنىڭ ديرەكتورى قۋانىش جاپاقوۆ ءمالىم ەتتى، دەپ حابارلايدى قازاقپارات.
«بيىلدىڭ 9 ايىندا 3535 مەملەكەتتىك قىزمەتشى تارتىپتىك جازاعا تارتىلدى. ونىڭ ىشىندە 10 پايىزى تارتىپتىك كوميسسيانىڭ ۇسىنىمى بويىنشا ادەپ قاعيدالارىن بۇزعانى ءۇشىن جاۋاپتى بولدى. اتاپ ايتقاندا، 8 مەملەكەتتىك قىزمەتشى قىزمەتىنەن تومەندەتىلدى، 17 ادام اتقارىپ وتىرعان لاۋازىمىنان بوساتىلدى»، - دەدى ق. جاپاقوۆ.
بەلگىلى بولعانداي، ادەپ جونىندەگى ۋاكىلدەر بارلىق ورتالىق مەملەكەتتىك جانە جەرگىلىكتى اتقارۋشى ورگانداردا ەنگىزىلگەن. رەسپۋبليكا بويىنشا ادەپ جونىندەگى بارلىعى 34 ۋاكىل قىزمەت اتقارادى. اعىمداعى جىلدىڭ 10 ايى ىشىندە ادەپ جونىندەگى ۋاكىلدەرگە 365 مەملەكەتتىك قىزمەتشى مەن ازاماتتار شاعىمدانىپ، كەڭەستەر الدى. اگەنتتىك مالىمەتىنە قاراعاندا، مەملەكەتتىڭ بارلىق اۋماقتارىندا قۇرىلعان جانە قىزمەت اتقارىپ كەلە جاتقان ادەپ جونىندەگى كەڭەستەردىڭ اعىمداعى جىلدىڭ 10 ايىندا 126 وتىرىس ءوتتى. ەگەر دە مەملەكەتتىك قىزمەتشى مەملەكەتتىك قىزمەتشىلەردىڭ ادەپ كودەكسىنىڭ تالاپتارىن بۇزسا، ادەپ جونىندەگى كەڭەس سول شەنەۋلىكتىڭ تارتىپتىك ءىسىن قارايدى.
ادەپ جونىندەگى كەڭەستەرمەن ماسەلەلەردى قاراۋ قورىتىندىسى بويىنشا ەنگىزىلگەن 207 ۇسىنىمنىڭ 95 پايىزى ورىندالعان. وسى رەتتە ۇسىنىمدار بويىنشا تارتىپتىك جاۋاپكەرشىلىككە 344 مەملەكەتتىك قىزمەتشى تارتىلدى، سونىڭ ىشىندە 54 پايىزى - قىزمەتتىك ادەپ تالاپتارىن بۇزعانى ءۇشىن.
