قىتاي قىسقى سپورت تۇرلەرىنە 300 ميلليون ادامدى تارتپاق - فوتو
قىتاي استاناسى ۇيىمداستىرۋ كوميتەتىنىڭ وسى جانە باسقا دا جوسپارلارى تۋرالى ق ح ر- دا تىركەلگەن وتاندىق ب ا ق («قازاقستان»، «24.kz»، «حابار» تەلەارنالارى جانە «قازاقپارات» ح ا ا) تىلشىلەرى شەتەلدىك جۋرناليستەر ءۇشىن ۇيىمداستىرىلعان حەبەي پروۆينتسياسىنىڭ چۋنلي ۋەزىندەگى يۋندين تاۋ شاڭعىسى كۋرورتىندا وتكەن باسپا ءسوز تۋرىندا ەستىپ ءبىلدى.
«2008-جىلى ءبىز جازعى وليمپيادا ويىندارىن ويداعىداي وتكىزدىك. ءبىز 2022-جىلعى قىسقى وليمپيادانى دا وسىنداي تابىسپەن وتكىزە الامىز. ءبىز حالىقارالىق وليمپيادا كوميتەتى بەيجىڭدى قاۋىپسىز، سەنىمدى ارىپتەس رەتىندە تاڭدايتىنىنا سەنىمدىمىز»، - دەدى بريفينگى بارىسىندا «بەيجىڭ - قىسقى وليمپيدادا-2022 وتكىزۋگە ۇمىتكەر- قالا» ۇيىمداستىرۋ كوميتەتىنىڭ جۇرتشىلىقپەن بايلانىس دەپارتامەنتىنىڭ باسشىسى ۆان حۋەي.
سونىمەن بىرگە ول الماتى دا ءوزىنىڭ ارتىقشىلىقتارى بار بەيجىڭگە باسەكەلەس قالا ەكەنىن اتاپ ءوتتى. ق ح ر دەنەشىنىقتىرۋ جانە سپورت ىستەرى جونىندەگى باس مەملەكەتتىك باسقارما قىسقى سپورت تۇرلەرىمەن 300 ميلليون ادامنىڭ اينالىسۋىنا مۇمكىندىك بەرەتىن ستراتەگيا جاساعانى اتالىپ ءوتىلدى. ول ەگەر بەيجىڭ جەڭىسكە جەتەتىن بولسا، سپورت يندۋسترياسىنىڭ دامۋىنا دا سەرپىن بەرەتىنىن ەسكە سالدى.
قىتاي استاناسىندا 3 پروبلەما بار. ۇيىمداستىرۋ كوميتەتى وسى ماسەلەلەردى شەشۋى ءتيىس. بۇلار: اۋانىڭ لاستانۋى - قىسقى وليمپيادا وتكىزۋ كەزىندە بەيجىڭ- تيانجين- حەبەي ايماعىندا اۋا ساپاسىن دۇنيەجۇزىلىك دەنساۋلىق ساقتاۋ ۇيىمى ستاندارتىنا جەتكىزۋ جوسپارلانۋدا. كومىردى پايدالانۋ 23 ميلليوننان 10 ميلليون تونناعا دەيىن قىسقارتىلاتىن بولادى.
قاردىڭ از بولۋى - وسى سەبەپپەن بەيجىڭدە مۇز ايدىنى جارىستارى وتەدى، ال قارلى سپورت تۇرلەرى چجانتسزياكوۋ مەن يانسيندە وتپەك. جاساندى قار ءۇشىن سۋ كوكتەمگى-جازعى كەزەڭدە ءۇش ارنايى جاسالعان سۋ قويماسىنا جينالادى (تاۋ قارىنىڭ ەرۋى جانە جاڭبىر).
بەيجىڭنەن سنوۋبورد پەن فريستايل جارىستارى وتەتىن يۋندين تاۋ شاڭعىسى كۋرورتىنا دەيىنگى قاشىقتىق 294 شاقىرىم. جۋرناليستەر ول جەرگە 6 ساعاتقا جۋىق ۋاقىتتا جەتتى. ۇيىمداستىرۋشىلار 2019-جىلى جوعارى جىلدامدىقتى بەيجىڭ-چجانتسزياكوۋ تەمىرجول تارماعى سالىناتىنىنا سەندىردى، سوندا بۇل قاشىقتىقتى 50 مينۋتتا ەڭسەرۋگە بولادى.
قىتاي بيلىگى بەيجىڭدەگى قىسقى وليمپيدادا ۇنەمدى بولادى دەگەن سەنىمدە.
«بىرىنشىدەن، ءبىز 2008-جىلعى وليمپيادالىق ويىندار مۇرالارىنان قالعان نىسانداردى پايدالانامىز. ەكىنشىدەن، نەعۇرلىم عىلىمي جانە پراكتيكالىق جوسپارلاۋدى قولداناتىن بولامىز. ۇشىنشىدەن، ءبىز شىعىنداردى قاتاڭ باقىلاۋعا الامىز»، - دەدى ۆان حۋەي.
بەيجىڭنىڭ رەسمي دوسەسىندە سپورتتىق جانە سپورتتىق ەمەس 25 نىساننىڭ 10-ى قازىردىڭ وزىندە جۇمىس ىستەپ تۇرعانى، 15 ءىن سالۋ جوسپارلانعانى كورسەتىلگەن، ونىڭ ىشىندە - 6 ۋى - سپورت كەشەندەرى. وليمپيادانى ۇيىمداستىرۋعا قىتاي 4 ميلليارد دوللاردان استام قارجى تارتادى، ونىڭ ىشىندە بيزنەس ينۆەستيتسيالارى دا بار. قىسقى وليمپيادالىق جانە پاراليمپيالىق ويىنداردان ىشكى نارىق ەسەبىنەن 858 ميلليون دوللار كىرىس تۇسپەك. ۇيىمداستىرۋشىلار وليمپياداشىلار جارىستارىنا 2 ميلليون 50 مىڭ، پاراليمپياداشىلار جارىستارىنا - 390 مىڭ بيلەت ساتۋعا نيەتتى. بيلەتتەر ساتۋدان تۇسەتىن تابىس 118 ميلليون دوللار بولماقشى.
كەيبىر شاڭعى جارىستارى ۇلى قىتاي قورعانى ماڭىندا وتەدى. وليمپيادا كەزىندە ۇيىمداستىرۋشىلار مۇندا مۇز مۇسىندەرى كورمەسىن وتكىزۋدى جوسپارلاۋدا.
بەيجىڭنىڭ كانديداتۋراسى بەكىتىلگەن جاعدايدا قىسقى وليمپيادا-2022 4-20- اقپان ارالىعىندا (اي كۇنتىزبەسى بويىنشا قىتاي جاڭا جىلىن مەرەكەلەۋ كۇندەرى)، ال پاراليمپيادا 4-13- ناۋرىز كۇندەرى وتپەك.
قارلى سپورت تۇرلەرىنەن جارىستار وتكىزىلەتىن باستى ورىن يۋندين تاۋ شاڭعىسى كۋرورتى بولادى. ونىڭ اۋماعى 100 شارشى شاقىرىم. وندا جوسپارلانعان جۇمىستار اياقتالعاندا قىتايداعى ءىرى تاۋ شاڭعىسى سپورتى نىسانىنا اينالادى. 2020-جىلعا قاراي 35 تاۋ شاڭعىسى جولدارى، جالپى ۇزىندىعى 70 شاقىرىمدىق 87 اسپالى جول جۇمىس ىستەيدى. جۋرناليستەرگە كورسەتىلگەن قوناق ءۇيدىڭ اۋدانى 130 مىڭ شارشى مەتر جانە وندا 2065 بولمە بار.
ەسكە سالا كەتەيىك، قازىرگى كەزدە 2022-جىلعى قىسقى وليمپيادا وتكىزۋگە الماتى مەن بەيجىڭ عانا ۇمىتكەر بولىپ وتىر.
