ناۋرىزداعى قويىلىمعا 300 جىلقى مەن 500 كوگەرشىن قاتىستىرىلادى
دەپ حابارلايدى قازاقپارات ءتىلشىسى.
باسپاءسوز حاتشىنىڭ سوزىنشە، اتبۇلاق اۋىلىندا ۇيىمداستىرىلاتىن « ۇلىستىڭ ۇلى كۇنى - ءاز ناۋرىز» مەرەكەسىنە وراي 40-تان استام كيىز ءۇي تىگىلەدى. ءقازىر مۇندا مەيرامعا دايىندىق جۇمىستارى جۇرگىزىلۋدە.
«قازىر اتالعان ەتنواۋىل جانە وعان كىرەبەرىس جەرىنە ارنايى قاقپا ورناتىلىپ، التىباقاندار مەن ۇلتتىق سالت- داستۇرلەر كورسەتىلەتىن ارنايى شاعىن ساحنالار قويىلۋدا. ارنايى الاڭشالاردا ۇلتتىق ويىندار وتكىزىلىپ، قولونەر شەبەرلەرى مەن ۇلتتىق تاعامداردىڭ كورمەسىن ۇيىمداستىرۋ جوسپارلانىپ وتىر. ال سالتاناتتى ءىس- شارا وتەتىن ۇلكەن ساحنا نۇق پايعامباردىڭ كەمەسى ىسپەتتەس جاسالۋدا»، - دەيدى مادينا سابىر.
مەرەكەلىك شارا «تىرشىلىكتىڭ باستاۋى - قازىعۇرت» قويىلىمىمەن باستالىپ، «كۇننىڭ جاڭارۋى»، «قىدىر اتانىڭ 12 ايمەن كەزدەسۋى»، «تابيعاتتىڭ ويانۋى»، «ناۋرىز تويى» سياقتى ساحنالىق قويىلىمدارمەن جالعاسادى. سونداي- اق «رۋحاني جاڭعىرۋ - ۇلتتى ۇلىقتاۋدىڭ ۇلى جولى» جانە «تاۋەلسىزدىك تۇندىگى - استانا» اتتى سازدى- حورەوگرافيالىق كومپوزيتسيالارى جۇرت نازارىنا ۇسىنىلاتىن بولادى. ولارعا بارلىعى 1500 ونەرپاز جۇمىلدىرىلىپ، 300 جىلقى، 500 كوگەرشىن مەن تۇيە جەگىلگەن كۇيمەلەر قاتىستىرىلادى.
«ناۋرىز قازىعۇرتتان باستالادى» ءىس- شاراسىنا وبلىستىق مادەنيەت جانە تىلدەردى دامىتۋ باسقارماسىنا قاراستى مادەنيەت جانە ونەر مەكەمەلەرىنىڭ ارتىستەرى جانە «شامسينۋر»، «فاراب»، «تۇمار»، «جۇلدىزدار»، «تاڭشولپان»، «قاراكوز»، «شاتتىق» بي ۇجىمدارى قاتىسادى. ولار مەرەكەلىك، پاتريوتتىق رۋحتاعى اسەم اندەر مەن كۇيلەردى، وڭىرىمىزدەن شىققان سازگەرلەر مەن كۇيشىلەردىڭ ءتول تۋىندىلارىن ورىندايدى»، - دەيدى مادينا سابىر.
مادەنيەت باسقارماسى 21 - ناۋرىز كۇنى ساعات 11.00-دە باستالاتىن اۋقىمدى مەرەكەلىك شاراعا بارشا وبلىس تۇرعىندارى مەن قالا قوناقتارىن شاقىرادى.
اۆتور: اينۇر اقبايەۆا
