قازاقستاندا كومىر مەن تەمىر كەنىشتەرىنىڭ جالپى قورى شامامەن 300-500 - جىلعا جەتەدى- مينيستر نۇرلان ساۋرانبايەۆ
«گەولوگيالىق ورتالىقتىڭ قۇرىلىسى وسى جىلدان باستاپ نازاربايەۆ ۋنيۆەرسيتەتىنىڭ اۋماعىندا باستالاتىن بولادى. وندا گەولوگتاردىڭ تولىققاندى قالاشىعى قۇرىلىپ، مۇراعات بازاسىنان باستاپ، زاماناۋي زەرتحانالارعا دەيىن گەولوگيالىق كلاستەرگە قاجەتتىنىڭ بارلىعى شوعىرلانادى. قازاقستاندا بۇگىنگى تاڭدا كاسىبي زەرتحانالار جوق، سوندىقتان ءبىز زەرتتەۋ مەن ساراپتامالاردى قىرعىزستاندا، رەسەيدە جاساتامىز. بۇل دۇرىس ەمەس، سەبەبى ول گەولوگيالىق ۇلگىلەر تۋرالى اقپاراتتى تاراتۋعا بولمايدى، ول وتە باعالى مالىمەت. ەندى مىنە وسى گەولوگيالىق بازا نازاربايەۆ ۋنيۆەرسيتەتىندە جينالادى. بارلىق كومپانيالار وسىندا بولادى» ، - دەدى ن. ساۋرانبايەۆ.
ۇكىمەتتە 2015-2019 - جىلدارعا ارنالعان گەولوگيالىق بارلاۋ جۇمىستارىنىڭ باعدارلاماسى بەكىتىلدى.
«باعدارلاماعا 161 ميلليارد تەڭگەدەن استام قاراجات قاراستىرىلعان. وتكەن بەسجىلدىقتا بۇل سوما شامامەن 40 ميلليارد تەڭگەنىڭ كولەمىندە بولدى» ، - دەيدى ۆيتسە- مينيستر.
ونىڭ سوزىنە قاراعاندا، قازاقستاندا پايدالى قازبالاردىڭ مول قورى ساقتاۋلى. سوندىقتان باعدارلاما اياسىندا قۇندى مەتالدار قورىنىڭ جاڭا كەنىشتەرىن ىزدەستىرۋگە باعىتتالاتىن بولادى.
«كومىر مەن تەمىر كەنىشتەرىنىڭ جالپى قورى شامامەن 300-500 - جىلعا جەتەدى. سول سەبەپتى مەملەكەت نەگىزگى كۇشتى سيرەك كەزدەسەتىن كەنىشتەرگە جۇمساۋى ءتيىس. وسى باعدارلامانى ءبىز پوليمەتالداردى، سيرەك كەزدەسەتىن مەتالل تۇرلەرىن، التىن، مىس قورىن بارلاۋعا باعىتتايمىز» ، - دەپ اتاپ ءوتتى ول.
