قارقارالىدا 300 ادام سياتىن 12 مەترلىك الىپ كيىز ءۇي بوي كوتەردى
تامىلجىعان تابيعات اياسىندا قۇرىلعان كيىز ۇيگە كەلەشەكتە تۋريستەر كوپتەپ كەلەدى دەگەن بولجام بار.
بەردىحان قينايات كيىز ءۇيدىڭ جابدىعىن سوناۋ قىتايدا ارنايى تاپسىرىسپەن جاساتىپتى. «ساپاسى وتە جوعارى»، - دەيدى ول. كەرەگەسى مەن ۋىعى تەمىردەن قۇيىلعان. ال ورتاسىنداعى بەس باقاننىڭ كومەگىمەن ءۇي بەرىك تۇرادى. شاڭىراعىن كوتەرگەندە ءتىپتى كرانمەن شىعارعان. تۇندىگى مەن تۋىرلىعى قالىڭ، سۋ وتكىزبەيدى.
بەردىحان قينايات، كاسىپكەر:
- مىنانىڭ سىرتى كيىز، كيىزى ءۇش قابات. ونىڭ سىرتىندا سەللوفان بار. ال ونىڭ سىرتىندا پالاتكاسى بار. ول وتە ساپالى، بىزگە بەرگەندە 5 جىلعا كەپىلدىگىمەن بەردى. ماقساتىمىز بار كۇشىمىزدى سالىپ، تۋريستەرگە قازاقتىڭ كىم ەكەنىن تانىتۋ. قازاقتىڭ سالت- ءداستۇرىن كورسەتۋ. قازاق بوپ دۇنيەگە كەلگەن سوڭ، ءوز ۇلتىڭدى ءوزىڭ تانىتا الماساڭ بولماس.
بەردىحان قينايات 2002 - جىلى قىتايدان اتا جۇرتقا قونىس اۋدارعان. «ءدال وسىنداي الىپ اق وردانى العاش رەت قىتايدا كوردىم»، - دەيدى ول. كەيىن ەرەكشە كيىز ءۇيدى قازاقستاندا دا تۇرعىزۋدى ويلاپتى. وسىلايشا «قاز اگرو قارجى» ارقىلى نەسيە الىپ، ءىسىن باستاپ كەتكەن. جوبا قۇنى شامامەن 12 ميلليون تەڭگە.
- كيىز ءۇيدىڭ بيىكتىگى 12 مەتر. 400 شارشى مەتر اۋماقتى الىپ جاتىر. 300 ادام سيادى. مۇندا كەلگەن تۋريستەر ۇلتتىق تاعامداردان ءدام تاتىپ، سايگۇلىكپەن تاۋدا سەرۋەندەي الادى. ءبىراق بەردىحان مۇنىمەن توقتاپ قالماق ەمەس، كاسىبىن ودان ءارى كەڭەيتۋدى كوزدەپ وتىر.
كاسىپكەردىڭ ايتۋىنشا، كەلەشەكتە بۇل جەر كىشىگىرىم ەتنواۋىلعا اينالماق. ياعني، مىنا الىپ كيىز ءۇيدىڭ ماڭىندا تاعى 8 بىردەي التى قانات اق وردا بوي كوتەرەدى. بۇل جەردە تۋريستەر تەك تىنىعىپ قانا قويماي، قازاقتىڭ سالت- داستۇرىمەن دە تانىسۋعا مۇمكىندىك الادى. ەتنواۋىلدىڭ اشىلۋى شىلدە ايىنىڭ اياعىنا جوسپارلانىپ وتىر.
