دالادا 30-40 گرادۋس ىستىق: نە ىستەۋ كەرەك؟
وسىعان وراي، قوعامدىق دەنساۋلىق ساقتاۋ ۇلتتىق ورتالىعىنىڭ ساراپشىلارى ىستىقتان قالاي قورعانۋ كەرەكتىگى تۋرالى ايتتى، دەپ حابارلايدى قازاقپارات ءتىلشىسى.
«كۇننىڭ ىسۋىنان كەلەتىن قاۋىپ-قاتەر كوپ، ادام ءولىمى كوبەيەدى. ونىڭ سەبەبى، ىستىق اۋا اعزاداعى قان اينالىم جۇيەسىنە كەرى اسەرىن تيگىزەدى. اعزاداعى سۋ جوعالىپ، قان ۇيىپ قالادى. سالدارىنان ترومب ءتۇزىلىپ، تامىرلار قىسىلادى. سوندىقتان، ىستىق اۋا رايىنان ينفاركت، ينسۋلت، قان ۇيىلۋ ءتارىزدى قان-تامىرلار اۋرۋى كوبەيەدى»، - دەپ حابارلادى ورتالىقتىڭ باسپا ءسوز قىزمەتى.
ورتالىقتىڭ العاشقى قاعيداسى - عيمارات ىشىندەگى سالقىن اۋانى ساقتاۋ. تەرەزەنى ايقارا اشپاي، پەردە مەن جاليۋزيدى ءتۇسىرۋ قاجەت. بۇل جاعدايدا كونديتسيونەر تاپتىرماس قۇرال بولار ەدى، ءبىراق كونديتسيونەر جۇمىس ىستەپ تۇرعان بولمەدە ەكى ساعاتتان ارتىق وتىرۋعا بولمايدى.
ەكىنشى قاعيدا - باس كيىم مەن ماقتادان تىگىلگەن اقشىل ءتۇستى كيىمدەر كيىپ، كولەڭكەدە جۇرۋگە تىرىسۋ كەرەك. جازدا مىندەتتى تۇردە كۇننەن قورعايتىن كوزىلدىرىك كيۋ قاجەت، سەبەبى قان تامىرلارىنىڭ قىسىلۋىنان كوز بۇلشىق ەتتەرىنە قىسىم ءتۇسۋى مۇمكىن.
ءۇشىنشى قاعيدا - كۇن استىندا 11:00 گە دەيىن نەمەسە 16:00 دەن كەيىن عانا قىزدىرىنۋعا بولادى. كۇن استىندا ءبىر جارىم ساعاتتان ارتىق جاتپاۋعا تىرىسىڭىز جانە كۇننەن قورعايتىن قۇرالداردى پايدالانىڭىز.
ءتورتىنشى قاعيدا - ىستىق اۋا رايىندا سۇيىقتىقتى كوپ ءىشىڭىز جانە سالقىن دۋش قابىلداڭىز. بۇل سۇيىقتىق تەڭگەرىمىن ۇستاۋعا كومەكتەسەدى.
بەسىنشى قاعيدا - الكوگولدى ىشىمدىكتەر دەنە تەمپەراتۋراسىن ەداۋىر كوتەرەدى، سوندىقتان ىستىق اۋا رايىندا الكوگولدى ىشىمدىكتەن باس تارتقان ءجون. نيكوتين قانعا وتتەگىنىڭ كەلۋىنە كەدەرگى جاسايدى، قان تامىرلارىن كىشىرەيتەدى، سوندىقتان ىستىق اۋا رايىندا شىلىم شەگۋ دە قاۋىپتى.
